У Віцебску праходзіць абласны форум лідараў саюза моладзі і піянерскай арганізацыі

Абласны форум лідараў БРСМ і БРПА "Мы - разам: захоўваем у сэрцах і памяць, і Вялікую Перамогу" праходзіць сёння ў Віцебску, паведамілі карэспандэнту БЕЛТА ў абласным камітэце БРСМ.

Другі год запар па ініцыятыве піянерскай і моладзевай абласных арганізацый праводзіцца сумесны форум, які аб'ядноўвае юных актывістаў і лідараў з рэгіёнаў. У 2014 годзе мерапрыемства было накіравана на прэзентацыю напрамкаў дзейнасці БРСМ і БРПА, выпрацоўку новых формаў супрацоўніцтва, захаванне пераемнасці. А ў гэтым годзе, які прысвечаны 70-годдзю Вялікай Перамогі, хлопцы сустрэнуцца, каб абмеркаваць вектар сумеснай працы грамадзянска-патрыятычнай накіраванасці.

Мерапрыемства адбудзецца на базе абласнога палаца дзяцей і моладзі. У ім возьмуць удзел больш за 100 чалавек: першыя сакратары тэрытарыяльных камітэтаў БРСМ, старшыні тэрытарыяльных саветаў БРПА, актывісты арганізацый, прадстаўнікі галоўнага ўпраўлення ідэалагічнай работы, культуры і па справах моладзі, упраўлення адукацыі аблвыканкама, ветэранскіх арганізацый, Фонду міру, Беларускага саюза ветэранаў вайны ў Афганістане.

Праграма форуму ўключае работу тэматычных пляцовак і абмеркаванне ў трох групах. Удзельнікі першай дадуць старт квэст-гульні на базе абласнога краязнаўчага музея, другой - прэзентуюць маладзёжную акцыю "Партызанскі костэр" на базе абласнога музея Героя Савецкага Саюза М.Шмырова. А ў трэцяй групе абмяркуюць за круглым сталом пытанні грамадзянскага выхавання моладзі ў духу міратворчасці і аб'явяць пачатак арт-акцыі "Перамога!".

У цэлым абласная моладзевая акцыя «Мы – разам: захоўваем у сэрцах і памяць, і Вялікую Перамогу» накіравана на далучэнне моладзі да культурна-гістарычнай спадчыны вобласці, прадугледжвае наведванне музеяў і экспазіцый з элементамі інтэрактыву.

Кацярына Князева