У Віцебску рэалізуюць найбуйнейшы інвестпраект па рэканструкцыі вуліцы-мікрараёна

З праблемных — у элітныя

Вуліца Гагарына некалі была сумным прамысловым раёнам на ўскраіне. На працягу апошніх двух дзесяцігоддзяў яна лічылася адной з самых праблемных у горадзе. Сёння тут рэалізуюць маштабны інвестпраект — найбуйнейшы ў вобласці. Доўгачаканая рэканструкцыя пяцікіламетровай вуліцы зусім хутка ператворыць яе ў вельмі прывабны і камфортны куток для жыцця гараджан і падарожжаў транзітных аўтамабілістаў. 

Прэзідэнт даручыў

— Можна сказаць, што гэты праект — практычнае выкананне задач, пастаўленых Прэзідэнтам на Усебеларускім народным сходзе, — адзначае намеснік старшыні аблвыканкама Уладзімір Белоус. — Маючы статус сацыяльна значнага, ён фінансуецца Банкам развіцця, створаным па ўказе Кіраўніка дзяржавы. У цэлым рэканструкцыя запатрабуе каля 39 мільёнаў рублёў, 14 з якіх ужо асвоены. Вуліцу Гагарына чакае мноства новаўвядзенняў. Памятаеце, Аляксандр Рыгоравіч у сваім выступленні на сходзе адзначыў: сёння мы пішам гісторыю свайго жыцця, і трэба зрабіць так, каб гісторыя кожнага з нас стала часткай гісторыі нашай прыгожай і ўтульнай краіны. Так вось, пройдзе яшчэ некалькі месяцаў, аб'ект будзе здадзены ў строй, і ўсе, хто сёння ўдзельнічае ў карэнных пераўтварэннях ускраіннага мікрараёна, зразумеюць: яны пакінулі годны след у летапісе роднага горада. Такі след, якім можна і трэба ганарыцца.



Новы імпульс будоўля атрымала летам мінулага года падчас візіту ў Віцебск Кіраўніка дзяржавы. Адкрываючы тады Полацкі пуцеправод, Аляксандр Лукашэнка пахваліў праекціроўшчыкаў і будаўнікоў.

— Атрымалася вельмі сучасная зручная развязка. Гэта помнік на стагоддзі, які мы пакідаем нашаму славянскаму гораду. Гэта найважнейшая дарога, і мы яе зрабілі, — ацаніў пабудаванае Прэзідэнт.

І тут жа агучыў наступны крок: пры ўзвядзенні пуцеправода віцябляне зэканомілі пэўную суму грошай. Просяць цяпер перадаць яе на вуліцу Гагарына, якая патрабуе рамонту. «Трэба яшчэ гэту вуліцу прывесці ў парадак», — запатрабаваў Кіраўнік дзяржавы, паабяцаўшы падтрымку.

Паскоранымі тэмпамі

…Гары шчэбню, пяску і бліскучых металічных труб. Сотні людзей і дзясяткіединиц тэхнікі. Даручэнне Прэзідэнта выконваецца паскоранымі тэмпамі. Згодна з графікам работ усе тры чаргі рэканструкцыі павінны быць скончаны да чарговага форуму мастацтваў «Славянскі базар у Віцебску». 

— З задачай справімся, — аптымістычны кіраўнік генпадраднай арганізацыі ААТ «Будаўнічы трэст № 9» Уладзімір Ленчыкаў. — Да працы прыступілі з 15 ліпеня. Цяпер тут штодня працуюць каля 200 нашых рабочых, а таксама прадстаўнікоў пяці субпадрадных арганізацый. Аб'ект няпросты. Праектаванне ў большасці сваёй вядзецца паралельна будаўніцтву. Нямалыя складанасці ўзнікаюць з інжынернымі сеткамі. Бо пераносіць даводзіцца буйныя магістральныя газа- і водаправоды, цеплатрасы, электрычныя і каналізацыйныя сеткі. Камунікацыі старыя. З 2010 года, калі распрацоўвалася праектна-каштарысная дакументацыя, многае змянілася. Не на ўсё, аказваецца, у уласнікаў маюцца дакладныя схемы і планы размяшчэння, часам бывае складана ўстанавіць гаспадарчую прыналежнасць. А ў непасрэднай блізкасці — буйныя абутковыя і швейныя прадпрыемствы, мноства школ, дзіцячых садкоў, прыватны сектар… Так што любыя памылкі небяспечныя.

Начальнік упраўлення механізацыі спецработ № 140 Сяргей Прахарэнка, які ажыццяўляе непасрэднае кіраўніцтва на аб'екце, прызнаецца: работы ішлі б значна хутчэй, калі б была магчымасць хоць на час перакрыць рух транспарту. Але гэта нерэальна.

— Транспартная нагрузка высокая, і перанакіраваць паток ніяк нельга, — адзначае ён. — Таму пры пераносе сетак даводзіцца рабіць праколы пад дарогай. А гэта вялікія затраты і часу, і сіл.

Злёгку падвяла генпадрадчыкаў і надвор'е. Яны наракаюць: мінулай зімой можна было ў гэты час нават плітку ўкладваць, а цяпер — і снег, і мароз прыпынілі земляныя работы. З улікам важнасці падземных камунікацый працягваць іх было небяспечна. Не дай бог пашкодзіш, скажам, цеплатрасу — увесь мікрараён, дзе жывуць дзясяткі тысяч людзей, застанецца без цяпла. Замарожаны грунт непрадказальны: можна разам з ім і кавалак трубы вырваць. 

— Нічога, ужо цяплее. Наверстаем, — задаволены тэмпамі сённяшняй работы Сяргей Барысавіч.

ч. — Хутка пачнем працоўны дзень суткамі лічыць, хоць ужо і цяпер працуем ад цямна да цямна. І без выхадных. Цяпер вось пераносім электрасеткі, мантуем падпорныя сцены (пашыраная вуліца будзе праходзіць у непасрэднай блізкасці ад дамоў), пракладваем водаправод, ужо прыступаем да будаўніцтва ачышчальных збудаванняў для ліўневай каналізацыі.

Ну, паехалі!

Якой жа будзе яна, абноўленая вуліца Гагарына? Той мікрараён, дзе людзі ўжо даўно не хацелі будавацца і здымаць жыллё? Нават у аб'явах па звычцы ўсё яшчэ пішуць: Гагарына не прапаноўваць…

Будаўнікі паказваюць праект: па абодва бакі абсталююць тратуары. Вось тут будуць разбіты зялёныя зоны, тут размесцяць клумбы. Дзевяць новых прыпыначных павільёнаў, сучасныя кіёскі… Заадно прывядуць у парадак фасады прылеглых дамоў, некаторыя дваравыя тэрыторыі, абсталююць з'езды і праезды. Так што аблічча неперспектыўнай у цяперашні час вуліцы зменіцца кардынальна.