У Віцебску з прыцягненнем бязвыплатнай кітайскай дапамогі пабудуюць першы ў Беларусі сацыяльны жылы дом
Ужо шмат гадоў Беларусь і Кітай звязваюць дружалюбныя адносіны. Новай вехай стала пагадненне паміж урадамі дзяржаў аб механізмах двухбаковага супрацоўніцтва па рэалізацыі праектаў тэхніка-эканамічнай дапамогі. Яшчэ адным вітком у гэтым напрамку стаў Мемарандум паміж беларускім Міністэрствам эканомікі і кітайскім Міністэрствам камерцыі аб выкарыстанні сродкаў, вылучаемых для будаўніцтва сацыяльнага жытла ў Беларусі. І цяпер абедзве краіны цвёрда ідуць курсам, які вызначылі падчас дамоўленасцей, адзначыў падчас урачыстай цырымоніі пачатку рэалізацыі міждзяржаўнага праекта ў Віцебску Надзвычайны і Паўнамоцны Пасол Кітая ў Беларусі Цуй Цымін.
— Беларусь і Кітай — гэта добрыя сябры і надзейныя партнёры. З моманту ўстанаўлення дыпламатычных сувязей нашы адносіны развіваюцца дынамічна і грунтуюцца на прынцыпах узаемнай павагі, роўнасці і выгады, — акцэнтаваў увагу Цуй Цымін, дадаўшы, што старт новага праекта сведчыць аб шчырых, цёплых адносінах кітайскага народа да беларускага.
Бязвыплатная падтрымка з боку замежных калег дазваляе як паўночнаму рэгіёну, так і рэспубліцы ў цэлым вырашыць мінімум дзве праблемы, сфакусаваныя ў галіне: занятасць работнікаў будаўнічых арганізацый, а таксама забеспячэнне жыллём тых, хто стаіць на ўліку як маючы патрэбу ў паляпшэнні жыллёвых умоў і мае права на атрыманне сацыяльнага жытла. А сёння ў гэты спіс па вобласці ўваходзяць 2907 чалавек, прычым найбольшая іх колькасць налічваецца ў Оршы і Віцебску. Таму, па словах намесніка старшыні аблвыканкама Уладзіміра Белавуса, менавіта ў гэтых гарадах і пачнеццарэалізацыя праекта. Гаворка ідзе пра будаўніцтва на Віцебшчыне двух аб'ектаў, першы з якіх — 120-кватэрны дом КПД №72 у мікрараёне Білева-3. Плануецца, што ён расчыніць свае дзверы для новасёлаў ужо ў лютым наступнага года. Паралельна з ім будзе ўзводзіцца 108-кватэрны жылы дом па вул. Завадскага ў Оршы, які маюць намер здаць у эксплуатацыю ў маі 2017-га. У гэтыя дамы ў агульнай складанасці будзе інвеставана звыш 13,6 млн беларускіх рублёў. Нягледзячы на тое, што генпадрадчыкам выступае ТАА «25-я кампанія кітайскай карпарацыі па чыгуначным будаўніцтве», на субпадрадзе задзейнічаны прыдзвінскія будаўнікі. У абласным цэнтры такая адказная місія легла на плечы Віцебскага ДСК, які будзе выкарыстоўваць у працы панэлі, што выпускаюцца на прадпрыемстве. Сваю ж прадукцыю для маналітнага дома ў Оршы прыменіць трэст №18. Рэалізацыя дадзенай праграмы знаходзіцца пад кантролем заказчыка — упраўлення капітальнага будаўніцтва аблвыканкама.
Важна
У нашай краіне з'явіцца шэраг сацыяльных дамоў з прыцягненнем тэхніка-эканамічнай дапамогі КНР. Першы этап праекта уключае ўзвядзенне ў розных рэгіёнах Беларусі 16 падобных дамоў, ключы ад кватэр у якіх атрымаюць каля 1,4 тыс. сем'яў.
— У паўночным рэгіёне гэта не першы праект, які рэалізуецца сумесна з прадстаўнікамі Кітая. Ужо пабудавана паратурбінная ўстаноўка на Лукомльскай ДРЭС, узводзіцца Віцебская ГЭС. Таму мы ведаем кітайскіх калег як надзейных дзелавых партнёраў, што прыдае ўпэўненасць у поспеху новага праекта, — адзначыў Уладзімір Мікалаевіч.
Другой прыступкай у рэалізацыі намечанага плана на тэрыторыі нашай вобласці стане будаўніцтва яшчэ чатырох жылых дамоў у Віцебску, Полацку, Наваполацку і Лепелі.
Афіцыйны старт сацыяльнага праекта ў Віцебску быў азнаменаваны закладкай на будпляцоўцы ў Білева-3 першага блока падмуркабудучага дома, на якім Цюй Цімін і Уладзімір Белавус пакінулі свае аўтографы і найлепшыя пажаданні.
Вольга Булаўка. Фота Антона СЦЯПАШЧАНКА. «Віцебскія весці».