У Віцебску сёння адбудзецца ўрачыстае закрыццё «Славянскага базару».

У Віцебску сёння адбудзецца ўрачыстае закрыццё "Славянскага базару". Праграма апошняга афіцыйнага дня форуму будзе насычанай. Так, у Доме кіно пройдзе адразу дзве прэзентацыі расійскіх кінафільмаў: карціны "Мужчынская жаночая гульня" Марыі Маханько і "Дачка" Аляксандра Касаткіна і Наталлі Назаравай. Падвойную радасць прынясуць "Тэатральныя сустрэчы-2013", у рамках якіх Маскоўскі тэатр "Шанс" прадставіць спектакль "Мужчына маёй мары" (у ролях Наталля Бочкарава, Алена Панова, Юлія Рамашына, Дзмітрый Арлоў), а Маскоўскі тэатр на Паўднёвым Захадзе - пастаноўку "Фотаапараты" (у ролях Аляксей Матошын, Алег Леушын, Любоў Ярлыкова, Алена Шастоўская, Андрэй Саннікаў, Міхаіл Беляковіч, Канстанцін Курачкін і інш.). У абласной філармоніі адбудзецца феерычнае шоў віртуозаў "Падвойная энергія. Ад Фрэйлехса да джаза".

Галоўныя канцэртныя мерапрыемствы традыцыйна пройдуць у Летнім амфітэатры. Так, у 18.00. тут збяруць аншлаг сямейныя пары - Леанід Агуцін і Анжаліка Варум, Наталля Падольская і Уладзімір Прэснякоў. Пазней верных прыхільнікаў фестывалю запросіць на ўрачыстае закрыццё форуму зорны россып яркіх імёнаў шоу-бізнесу: для гледачоў выступяць Ларыса Даліна, Леанід Агуцін, Андрэй Барынаў, Пётр Дранга, Анжаліка Варум, Аляксандр Коган, Вольга Кормухіна, Юлія Савічава, Пётр Елфімаў, Мікалай Скорыкаў, ансамбль танца "Зорка", Злата Огневіч, пераможцы дзіцячага і дарослага конкурсаў і інш. Пры гэтым, нягледзячы на ўжо вядомыя балы ўдзельнікаў, у Міжнародным конкурсе выканаўцаў эстраднай песні "Віцебск-2013" пакуль па-ранейшаму захоўваецца інтрыга, якая цалкам рассеецца толькі сёння днём на цырымоніі ўзнагароджання пераможцаў конкурсу.