У Віцебску адбыўся самы маштабны па колькасці лотаў аўкцыён

У Віцебску сёння адбыўся аўкцыён па продажы 134 лотаў, сфарміраваных з правоў арэнды месцаў размяшчэння нестацыянарных гандлёвых аб'ектаў і летніх кафэ. Гэтыя таргі сталі самымі маштабнымі па колькасці прадметаў аўкцыёну за ўсю гісторыю малой прыватызацыі ў абласным цэнтры, паведамілі карэспандэнту БЕЛТА ў гарвыканкаме.

У выніку рэалізавана каля 60% лотаў, сума выручаных на аўкцыёне сродкаў паступіць у бюджэт горада. Акрамя таго, арэндадаўцы, а гэта камунальныя прадпрыемствы, будуць пералічваць 50% паступаючай арэнднай платы таксама ў гарадскую казну.

Самымі запатрабаванымі апынуліся сем пляцовак па 100 кв.м пад летнія кафэ ў зоне адпачынку цэнтральнай часткі горада на беразе Заходняй Дзвіны, пры гэтым адзін з такіх лотаў выкуплены за Br60 млн пры пачатковай цане больш за Br2,5 млн. Найбольш упарта гандляваліся некалькі ўдзельнікаў за магчымасць арэнды дзвюх пляцовак па 15 кв.м пад размяшчэнне аўтамагазіна на праспекце Фрунзе. У выніку цана продажу кожнага з лотаў перавысіла пачатковую ў 130 разоў, а пераможца заплаціць за іх у агульнай суме Br100 млн.

У склад прадметаў аўкцыёну былі ўключаны ўчасткі тэрыторыі з пліткавым пакрыццём плошчай ад 5 да 100 кв.м у розных частках горада, у асноўным у месцах адпачынку і паркавых зонах. Тэрмін іх арэнды ўстаноўлены па 31 кастрычніка бягучага года, а пляцоўкі пад размяшчэнне аўтамагазінаў здаюцца ў арэнду на год. Месцы вызначаны па выніках праведзенага упраўленнем гандлю гарвыканкама маніторынгу з улікам шэрагу крытэрыяў, у тым ліку патрэб насельніцтва ў паслугах і запатрабаванасці тых ці іншых участкаў у суб'ектаў гаспадарання. Фактычна гаворка ідзе аб продажы правоў арэнды месцаў пад нестацыянарную гандлёвую сетку горада, растлумачылі спецыялісты. Патэнцыйныя арандатары павінны адпавядаць шэрагу ўмоў, у прыватнасці, для адкрыцця летняга кафэ патрабуецца мець стацыянарны аб'ект грамадскага харчавання ў абласным цэнтры. Рэжым працы для такіх сезонных кафэ ўстаноўлены да 23.00, пры гэтым працягласць музычнага суправаджэння абмежавана да 21.00. Тут неабходна ўсталяваць па два біятуалеты каля кожнага аб'екта. Праца кафэ не павінна выклікаць скаргаў жыхароў бліжэйшых дамоў.