У Віцебску стартаваў абласны турнір па міні-футболе сярод работнікаў РУП «Віцебскэнерга».
У абласным цэнтры на базе ДЮСШ ФК «Віцебск» стартаваў абласны турнір па міні-футболе сярод работнікаў РУП «Віцебскэнерга», прысвечаны 60-годдзю Віцебскай энергасістэмы. У спаборніцтвах удзельнічаюць каманды 16 філіялаў прадпрыемства з гарадоў і раёнаў Прыдзвінскага краю.
Падчас урачыстай цырымоніі адкрыцця турніру з прывітаннем да яго ўдзельнікаў звярнуўся старшыня абласнога Савета дэпутатаў Уладзімір Цярэнтаў. Ён пажадаў ім абысціся без траўм і выказаў надзею, што спаборніцтвы атрымаюцца відовішчнымі.
– Вельмі прыемна, што адміністрацыя прадпрыемства і прафсаюзны камітэт вялікую ўвагу надаюць не толькі вытворчым пытанням, але і развіццю фізічнай культуры, спорту і адпачынку, – адзначыў Уладзімір Уладзіміравіч. – Выдатна, што энергетыкі займаюцца менавіта футболам. Гэта калектыўная гульня. Бо ў працы часам узнікаюць сітуацыі, калі важна наяўнасць калектыўнага духу, неабходна бывае падставіць плячо таварышу. А футбол якраз дазваляе адчуць дух каманды.
Гэта станоўча адбіваецца і ў працы. Акрамя таго, рэгулярныя трэніроўкі дапамагаюць трымаць сябе ў тонусе.
У падобным фармаце спаборніцтвы праводзяцца ўпершыню.
– У папярэднія гады футбольныя спаборніцтвы ўваходзілі ў склад кругласутачнай галіновай спартакіяды, – паведаміў намеснік гендырэктара РУП «Віцебскэнерга» Уладзімір Дзіклаў. – У гонар 60-годдзя віцебскай энергасістэмы вырашана правесці асобна спаборніцтвы па футболе.
Турнір праходзіць на працягу двух дзён. На папярэднім этапе каманды згуляюць у чатырох падгрупах па столькі ж каманд. Дзве лепшыя дружыны кожнага квартэта выходзяць у плэй-оф.
Каманда філіяла «Энергазбыт» з Віцебска з'яўляецца адным з фаварытаў турніру. У папярэднія гады яна займала прызавыя месцы ў галіновых футбольных спаборніцтвах.
– Заняткі футболам развіваюць фізічную сілу і прыносяць задавальненне, – адзначыў гулец каманды Аляксандр Шчукін. – Для мяне футбол больш, чым хобі. Мы трэніруемся 2 разы на тыдзень. Заняткі футболам дазваляюць адцягнуцца, зарадзіцца новай энергіяй, каб надалей плённей працаваць.