У Віцебску трое наркаманаў бітамі жорстка збілі сваіх знаёмых

У Віцебску трое наркаманаў бейсбольнымі бітамі жорстка збілі знаёмых, з якімі сумесна ўжывалі наркотыкі. Пра гэта БЕЛТА паведамілі ва ўпраўленні Следчага камітэта па Віцебскай вобласці.

Раніцай 5 сакавіка ў праваахоўныя органы з установы аховы здароўя паступіла паведамленне, што да іх брыгадай хуткай дапамогі ў стане наркатычнага ап'янэння з чэрапна-мазгавымі траўмамі дастаўлены жанчына 1991 года нараджэння і двое мужчын 1989 і 1978 гадоў нараджэння.

На месца здарэння неадкладна выбыла следча-аператыўная група. Устаноўлена, што цялесныя пашкоджанні пацярпелым былі прычынены трыма іх знаёмымі пасля сумеснага ўжывання наркатычных рэчываў у кватэры аднаго з пацярпелых. Цялесныя пашкоджанні прычыняліся бейсбольнымі бітамі.

Дзеянні падазраваных характарызуюцца нематываванай асаблівай жорсткасцю, пра што сведчыць цяжкасць прычыненых цялесных пашкоджанняў, а таксама выяўленае ў ходзе агляду месца здарэння разламаная на шчэпкі прылада злачынства.

У цяперашні час пацярпелыя знаходзяцца ў рэанімацыйным аддзяленні ўстановы аховы здароўя ў вельмі цяжкім стане. Падазраваныя затрыманы. Гэта жыхары горада Віцебска. Двое з іх 1992 года нараджэння, трэці - 1993 года нараджэння. З імі працягваюць працаваць следчыя.

Віцебскім гарадскім аддзелам Следчага камітэта ўзбуджана крымінальная справа па ч.3 арт.147 (наўмыснае прычыненне цяжкага цялеснага пашкоджання, здзейсненае ў дачыненні да трох асоб) Крымінальнага кодэкса.