У Віцебску завяршыўся міжнародны турнір па пляжным футболе
На працягу трох дзён на ўтульным стадыёне ў пойме ракі Віцьбы кіпелі няпростыя запалы. Сярод каманд Беларусі, Ірана, Турцыі і Эстоніі выбіралі самую годную. Матывацыі дадавала і тое, што «Кубак Дружбы» ўпершыню праводзіўся пад эгідай Міжнароднай федэрацыі пляжнага футбола.
Святочнага настрою гледачам (а на кожнай гульні трыбуны былі запоўненыя пад завязку, хоць прамыя трансляцыі вёў тэлеканал «Беларусь 5») дадавала тое, што дзеянне праходзіла пад музыку, у перапынках прысутных забаўлялі танцоркі з групы падтрымкі «Тайм-аўт». Акрамя таго, заўзятарам разабрацца ў тым, што адбываецца, дапамагаў каментатар, старэйшына гэтага цэха ў Беларусі Уладзімір Навіцкі.
Турнір праходзіў па кругавой сістэме, гэта значыць усе каманды мераліся сіламі адна з адной. Да апошняга гульнявога дня па дзве перамогі было ў актыве гаспадароў і іранцаў, а ў Эстоніі і Турцыі ў графе «ачкі» стаілі прачэркі. Ва ўпартай матчы за 3-е месца поспех усміхнуўся дружыне з берагоў Балтыйскага мора.
Павышаная ўвага заўзятараў, вядома, была прыкавана да вырашальнага паядынку, дзе беларусам супрацьстаялі іранцы. Гасцей ужо некалькі гадоў трэніруе легендарны Марка Актавіа. Пад кіраўніцтвам гэтага спецыяліста зборная Бразіліі 6 разоў (!) станавілася чэмпіёнам свету.
Дзівосны па напружанні і змесце фінальны матч атрымаўся на задавальненне. Да апошніх секунд не было зразумела, чым усё скончыцца. Ініцыятыва па павелічэнні ліку зыходзіла ад азіяцкіх футбалістаў. Але на кожны іх гол нашы спартсмены адказвалі сваім. Асабліва добрым быў другі, калі капітан беларусаў Ігар Брышцель прайшоў, жанглюючы мячом, па флангу, а затым неадбіўна прабіў у далёкі верхні вугал. На жаль, у самай канцоўцы гасцям удалося забіць вырашальны мяч. Кубак за 1-е месца, медалі і дыпломы ім уручылі намеснік старшыні аблвыканкама Уладзімір Церанцьеў і старшыня Асацыяцыі «Беларуская федэрацыя футбола» Сяргей Румас.
Варта адзначыць, што Іран заваёўвае Гран-пры ўжо трэці раз запар, пацвярджаючы статус адной з наймацнейшых каманд у свеце. Прыемна, што найлепшым гульцом турніру прызнаны віцебскі паўнамоцны прадстаўнік у нашай зборнай Іван Канстанцінаў.
Былі заахвочаны і тыя людзі і арганізацыі, дзякуючы якім адбыўся сёлетні «Кубак Дружбы». У прыватнасці, кіраўнік вобласці Мікалай Шарснёў быў адзначаны памятным дыпломам і мячом з аўтографамі футбалістаў беларускай дружыны.
У цэлым арганізацыя прадстаўнічага турніру была на высокім узроўні, што адзначыў галоўны менеджэр Міжнароднай федэрацыі пляжнага футбола Рыкарда Гарсія. Ён падзякаваў гаспадароў за гасціннасць і падараванае свята спорту, а таксама выказаў надзею прыехаць зноў у бліжэйшай будучыні.
Алесь Бынькоў, "Віцебскія весці"