У віцебскіх лясах з-за моцных снегападаў могуць пацярпець казулі

3 студзеня, Віцебск /Дзіяна Курыла - БЕЛТА/. Шчодрыя снегапады, якія абрынуліся на Віцебскую вобласць, могуць несці небяспеку пагалоўю казуль, расказаў карэспандэнту БЕЛТА галоўны паляўніцтвазнаўца Віцебскага дзяржаўнага лесагаспадарчага аб'яднання Уладзімір Муравіцкі. Асноўным зімовым кормам для казулі з'яўляюцца ягаднікі. Здабываць іх яна можа, калі вышыня снежнага покрыва не перавышае 40 см. Паводле даных Віцебскага абласнога цэнтра па гідраметэаралогіі і маніторынгу навакольнага асяроддзя, вышыня снежнага покрыва ў вобласці вагаецца ад 33 см на поўдні да 57 см на поўначы. З-за такой багацця снегу не толькі казулі, але і дзікі з цяжкасцю могуць здабываць сабе корм, таму на дапамогу ім прыходзяць егеры. Для дзікоў у паляўнічых гаспадарках створана каля тысячы падкормных пляцовак, такія ж пляцоўкі працуюць для казуль. Дзікоў падкормліваюць збожжавымі адходамі і бульбай, а казулям выкладваюць сена. А вось ласі і алені, па словах Уладзіміра Муравіцкага, вялікіх нязручнасцей з-за высокіх снягоў не адчуваюць. Гэтыя капытныя харчуюцца галінамі лісцевых дрэў і дастаць іх могуць без асаблівых праблем. У лясах вобласці, паводле падлікаў 2010 года, жыве больш за 17 тыс. дзікоў, 7,5 тыс. ласёў, звыш 13 тыс. казуль, налічваецца больш за 1 тыс. асобін аленя. У лютым бягучага года пачнецца чарговая штогадовая перапіс жывёл. На тэрыторыі вобласці працуе 61 паляўнічая гаспадарка.-0-