У Віцебскай вобласці больш за 80% трактароў гатовыя да вясновай пасяўной
На Віцебшчыне больш за 80% трактароў гатовыя да вясенняй пасяўной кампаніі. Пра гэта паведаміў журналістам перад пачаткам пасяджэння Віцебскага аблвыканкама старшыня камітэта па сельскай гаспадарцы і харчаванні Іван Фёдараў.
Старшыня камітэта падкрэсліў, што гаспадаркам варта актывізаваць работу па падрыхтоўцы тэхнікі. Па стане на 20 лютага, гатоўнасць трактароў і сельгасмашын у цэлым па вобласці складае больш за 80%. Пры гэтым па раёнах сітуацыя розніцца, і некаторым трэба значна паскорыць работы.
"Гатовыя насенныя фонды, вядзецца назапашванне мінеральных угнаенняў, пры гэтым у параўнанні з мінулым годам на гэту дату мы іх запасли ў два разы больш. Назапашваем і гаруча-змазачныя матэрыялы. Адна з праблем - недахоп механізатараў. Будзем яе вырашаць, прыцягваючы спецыялістаў прамысловых прадпрыемстваў з гарадоў і райцэнтраў. Нам неабходна ўкамплектаваць гаспадаркі кадрамі так, каб у гарачую пару пасяўной кампаніі арганізаваць працу тэхнікі ў дзве-тры змены", - сказаў Іван Фёдараў.
Ён адзначыў, што галоўная задача для аграрыяў - правесці пасяўную ў максімальна сціслыя тэрміны на высокім тэхналагічным узроўні. З улікам таго, што восенню рэгіён правёў значны аб'ём работ па ворыве палёў (паднята практычна 300 тыс. га ворнай зямлі), вясновая падрыхтоўка глебы не павінна расцягнуцца. Мэта - правесці работы за два тыдні. І гэта цалкам пасільная задача, лічыць старшыня камітэта. У бягучым годзе рэгіён працягне абнаўленне машынна-трактарнага парку сельгастэхнікі. Плануюцца пастаўкі на ўзроўні 2017 года.
"Мы ў мінулым годзе закупілі больш за 1,2 тыс. адзінак тэхнікі. Такія ж аб'ёмы намечаны на 2018-ы. На гэтыя мэты выдзяляюцца грошы з абласнога бюджэту, закупкі ідуць і за кошт уласных сродкаў сельскагаспадарчых арганізацый", - сказаў Іван Фёдараў. Агульная плошча пасяўных плошчаў рэгіёну ў бягучым годзе складзе 796 тыс. га, з іх 50% плануецца засеяць збожжавымі культурамі (каля 400 тыс. га), у тым ліку вясной - 242 тыс. га.