У Віцебскай вобласці ідзе планамернае развіццё цяжкай атлетыкі
А нядаўна ў Воршы адкрылося аддзяленне цяжкай атлетыкі, дзе ўжо займаюцца каля 40 хлопцаў. Старшы трэнер Віцебскай вобласці па цяжкай атлетыцы, які больш за 45 гадоў выхоўвае чэмпіёнаў міжнародных стартаў, Уладзімір Смаляк расказаў пра апошнія поспехі нашых спартсменаў і планы на 2020 год.
-- У мінулым сезоне наш выхаванец майстар спорту міжнароднага класа, член зборнай Беларусі Аляксандр Берсанаў на чэмпіянаце свету стаў другім у рыўку. У штуршку, праўда, дапусціў асечку, і ў выніку заняў чацвёртае месца. Паспяхова выступілі і нашы юніёры на першынстве Еўропы, куды ездзіў віцебскі трэнер Аляксандр Красоўскі: Аляксандр Марчанка выканаў нарматыў майстра спорту і стаў 6-м, Данііл Ільін заняў 8-е месца, а Уладзіслаў Цвяцінскі заняў 4-е месца з вынікам 261 кілаграм (119+146) у суме дваябор'я. У рыўку ў першым падыходзе нашаму атлету скарыліся 111 кілаграмаў. Другая спроба была ўдалай — 116. У трэцім падыходзе Уладзіслаў паспяхова вырваў 119. Па выніках рыўка заваяваў срэбра і ўстанавіў некалькі рэкордаў Еўропы сярод юнакоў. У штуршку ў першым падыходзе юнак штурхнуў штангу вагой 135 кілаграмаў. У другой спробе нашаму атлету скарыліся 142 кілаграмы. У заключным падыходзе суддзі ўбачылі парушэнне і спробу не залічылі.
Адзначаючы тое, што гэтыя хлопцы выраслі ў нашай новай спецыялізаванай зале па цяжкай атлетыцы абласнога комплекснага цэнтра алімпійскага рэзерву, Уладзімір Смаляк яшчэ раз падкрэсліў, як важна, што створаны годныя ўмовы для трэніроўкі спартсменаў. Вынікі – на твары!
Цяпер цяжкаатлеты Віцебшчыны рыхтуюцца да першынства рэспублікі, якое пройдзе ў Бабруйску, абласных стартаў, а таксама Кубка Беларусі ў Барысаве.
-- У Віцебску пакуль нам не хапае аднаўленчага цэнтра, хлопцам пасля заняткаў неабходна расслабляць мышцы. Пакуль вымушаны арандаваць сауну ў ФАК раз на тыдзень, -- адзначае Уладзімір Уладзіміравіч. -- Зала ў Віцебску, як і аддзяленне цяжкай атлетыкі ў Оршы, адкрыліся дзякуючы падтрымцы старшыні аблвыканкама Мікалая Шарстнёва, які, як вядома, нягледзячы на сваю занятасць заўсёды знаходзіць час для трэніровак і спаборніцтваў. Аказваюць дапамогу ў правядзенні збораў, спаборніцтваў абласны комплексны цэнтр алімпійскага рэзерву, упраўленне спорту і турызму аблвыканкама, знаходзім і спонсараў.
Важна падтрымаць імкненне юных атлетаў да здаровага, актыўнага ладу жыцця, бо камусьці з іх, магчыма, давядзецца прадстаўляць нашу краіну на Алімпійскіх гульнях.