У Віцебскай вобласці медыкі прапануюць замяніць цыгарэты ёгай і скандынаўскай хадой

На Віцебшчыне 16 — 19 лістапада праходзіць рэспубліканская антытытунёвая акцыя

, прымеркаваная да Адзінага дня здароўя «Сусветны дзень некурца. Прафілактыка анкалагічных захворванняў», які прызначаны на 19 лістапада.

Як паведамілі ў абласным цэнтры гігіены, эпідэміялогіі і грамадскага здароўя, у рэгіёне адбудзецца нямала цікавых тэматычных мерапрыемстваў, якія дазволяць чарговы раз прыцягнуць увагу да магчымых негатыўных наступстваў актыўнага і пасіўнага курэння. Таксама мэта акцыі – арыентаваць насельніцтва на здаровы лад жыцця, прапанаваць карысныя альтэрнатывы тытуню.

Напрыклад, у сталіцы Прыдзвіння Віцебскі занальны цэнтр гігіены і эпідэміялогіі сумесна са студыяй «ПРАНА» як варыянт актыўнага баўлення часу рэкамендуюць ёгу. Яны правядуць акцыю «Вазьмі сябе ў рукі». У Верхнядзвінску сумесна з клубам «Белыя вароны» для моладзі будзе арганізаваны велапрабег. А ў Наваполацку валанцёры падлеткавага клуба «Знаўцы здароўя» будуць раздаваць у трамваях тэматычныя матэрыялы па праблеме курэння. У Полацку пройдзе флэш-моб і ўрокі скандынаўскай хадзьбы. Медыкі Докшыцкага раёна прапануюць замяніць нікацін на вітаміны. На Дубровеншчыне 19 лістапада будзе прыпынены продаж тытунёвых вырабаў у гандлёвай сетцы райцэнтра.

Ва ўсіх буйных гарадах вобласці ў дні акцыі на вулічных экранах, у грамадскім транспарце, на тэлебачанні будзе круціцца сацыяльная рэклама пра шкоду курэння.

Наталля Рыжкова, «Віцебскія весці».