У Віцебскай вобласці мясцовыя Саветы дэпутатаў усіх узроўняў абновяцца прыкладна напалову
З ліку дэпутатаў дзеючага склікання на новы тэрмін вырашылі балатавацца больш за 1,8 тыс. чалавек, або каля 59% ад агульнай колькасці народных выбраннікаў. Іншымі словамі, ужо на гэтым этапе выбарчай кампаніі можна выказаць здагадку, што па выніках выбараў 18 лютага склад мясцовых Саветаў дэпутатаў Віцебскай вобласці абновіцца амаль напалову.
Сярод патэнцыйных кандыдатаў больш за 1,7 тыс. жанчын, 141 малады чалавек (да 30 гадоў), а таксама сем грамадзян Расійскай Федэрацыі. Найбольшы ўзровень канкурэнцыі складваецца на выбарах у абласны Савет дэпутатаў, дзе на адно месца прэтэндуюць крыху больш за два чалавекі, а таксама ў гарсаветы гарадоў абласнога (Віцебск і Наваполацк) і раённага падпарадкавання - адпаведна 1,9 і 1,4 прэтэндэнта.
У Саветах іншых узроўняў (раённыя, пасялковыя, сельскія) канкурэнцыя складае прыкладна 1,1 чалавека на мандат. Больш за 3,1 тыс. прэтэндэнтаў (92,7% ад агульнай колькасці) выкарысталі адзін з магчымых спосабаў вылучэння, а 2 патэнцыйных кандыдата заручыліся падтрымкай і працоўных калектываў, і грамадзян, і палітычнай партыі. Каля 97,9% з 2559 зарэгістраваных ініцыятыўных груп сабралі подпісы і здалі ўсе неабходныя дакументы ў выбарчыя камісіі. Усяго ад партый вылучаюцца 142 актывіста, у тым ліку ад КПБ 44 чалавекі, ЛДП - 43, Беларускай партыі левых "Справядлівы свет" - 18, Аб'яднанай грамадзянскай партыі - 15, Рэспубліканскай партыі працы і справядлівасці - 14, Партыі БНФ - 5.
На выбарах 18 лютага 2018 года ў Віцебскай вобласці трэба будзе выбраць 3112 дэпутатаў, у тым ліку 2253 у сельскія і пасялковыя, 133 - у гарадскія, 666 - у раённыя Саветы, а таксама 60 дэпутатаў у абласны Савет.