У Віцебскай вобласці на зімовых канікулах у школьных лагерах адпачнуць 11,9 тыс. дзяцей
У Віцебскай вобласці за час зімовых канікул у школьных лагерах адпачнуць 11,9 тыс. дзяцей, паведамілі карэспандэнту БЕЛТА ва ўпраўленні адукацыі Віцебскага аблвыканкама.
Праца лагераў будзе арганізавана з 25 снежня па 8 студзеня. Перыяд аздараўлення складзе не менш за сем дзён. Кошт пуцёўкі - Br130,2 тыс., суткі - Br18,6 тыс. На фінансаванне аздараўлення з Фонду дзяржаўнага сацыяльнага страхавання выдзелена каля Br1,6 млрд.
Насычаная праграма адпачынку школьнікаў уключае масу прыемных і карысных мерапрыемстваў. Так, з улікам навагодніх і калядных святаў будуць арганізаваны шматлікія культурна-забаўляльныя праграмы, гумарыстычныя віктарыны, конкурсы, інтэлектуальныя турніры, экскурсіі. Пры гэтым дзеці будуць прыцягвацца да ўдзелу ў дабрачынных праектах, арганізаваных пярвічкамі БРСМ.
Няад'емнай часткай зімовых канікул стануць спартыўныя гульні на адкрытым паветры, паходы на лыжах, катанні на каньках. Спецыяльна для гэтага толькі ў абласным цэнтры заліта 39 хакейных скрынак і 10 лядовых пляцовак, у тым ліку два каткі на плошчы Перамогі, па адным каля Летняга амфітэатра і на Цэнтральным спартыўным комплексе "Дынама". Для аматараў актыўнага адпачынку ў горадзе адкрыта 12 пунктаў пракату зімовага спартыўнага інвентару, абсталявана 7 лыжных трас, у тым ліку - у парку імя Савецкай Арміі і ў зоне адпачынку ў пойме Віцьбы.