У Віцебскай вобласці перавыканалі план па летнім аздараўленні дзяцей
Нягледзячы на ўсе асцярогі, звязаныя з пандэміяй каранавіруса, летняя аздараўленчая кампанія ў гэтым годзе на Віцебшчыне прайшла лепш за ўсе чаканні. Лагеры з кругласутачным знаходжаннем былі запоўнены стопрацэнтна, а план па аздараўленні дзяцей перавыкананы на 4%.
– У гэтым сезоне ў вобласці функцыянаваў 71 лагер з кругласутачным знаходжаннем і 606 – з дзённым. У іх аздаравіліся каля 41 тыс. дзяцей пры плане 39,4 тыс., – паведаміла начальнік прадстаўніцтва Віцебскае абласное ўпраўленне Рэспубліканскага цэнтра па аздараўленні і санаторна-курортным лячэнні насельніцтва Сняжана Цітова. – У цэлым аздараўленчая кампанія 2021 года прайшла паспяхова. Гэтаму спрыялі адказнае стаўленне да аздараўлення дзяцей усіх зацікаўленых службаў, фінансавыя ўкладанні ўласнікаў лагераў і дапамога гарадскіх, раённых і абласных бюджэтаў у падрыхтоўцы да летняга сезона, на што было зрасходавана больш за 3 млн рублёў.
Сняжана Аляксандраўна адзначыла, што ўвагай былі ахоплены ўсе катэгорыі дзяцей. Так, за кошт сродкаў абласнога бюджэту ў лагеры «Чайка» ААТ «Маналіт» з карысцю правялі лета 22 падлеткі, з якімі праводзіцца індывідуальная прафілактычная праца. Усяго ў перыяд летніх канікул у лагерах рознага тыпу былі заняты звыш тысячы цяжкіх падлеткаў.
Таксама аздараўленне прайшлі амаль 2 тыс. дзяцей-сірот і тых, хто застаўся без апекі бацькоў, 5,1 тыс. рабят з шматдзетных і малазабяспечаных сем'яў, прычым для іх пуцёўкі датаваліся на 100% дзякуючы падтрымцы абласнога і мясцовых бюджэтаў.
Магчымасць адпачыць і паправіць здароўе ў летні перыяд была прадастаўлена 381 дзіцяці-інваліду. Напрыклад, «Радуга» Віцебскага абласнога дзіцячага клінічнага цэнтра прыняла 40 дзяцей з ДЦП, парушэннямі апорна-рухальнага апарату, органаў зроку і слыху.
А больш за 1,2 тыс. падлеткаў вырашылі сумясціць прыемнае з карысным і правялі канікулы ў лагерах працы і адпачынку. Хлопчыкі і дзяўчынкі дапамагалі ў добраўпарадкаванні і азеляненні, рамонце школ і навучальнай мэблі, шылі спецадзенне і г. д. У сярэднім яны зарабілі па 250 – 460 рублёў.
Хоць навучальны год яшчэ толькі пачаўся, ужо прапрацоўваецца пытанне па аздараўленні дзяцей падчас маючых адбыцца канікул. Для школьнікаў будуць арганізаваны лагеры з дзённым знаходжаннем, дзе ў перыяд восеньскіх і зімовых канікул змогуць адпачыць 21,2 тыс. дзяцей.