У Віцебскай вобласці апошні званок прагучыць для больш чым 16,7 тыс. выпускнікоў

Свята апошняга званка ў школах Віцебскай вобласці адбудзецца 30 мая. Урачыстыя лінейкі ў гэты дзень стануць знамянальнай падзеяй у жыцці каля 16 750 выпускнікоў агульнаадукацыйных устаноў рэгіёну, паведаміў начальнік упраўлення адукацыі Віцебскага аблвыканкама Іван Шчурок.

Асабліва ўрачыстым гэты суботні дзень стане для 6 тыс. 750 выпускнікоў 11-х класаў, якім сёлета трэба будзе атрымаць атэстат аб сярэдняй адукацыі. Пасведчанне аб базавай адукацыі пасля здачы экзаменаў у Віцебскай вобласці атрымаюць звыш 10 тыс. дзевяцікласнікаў.

Гаворачы аб маючых адбыцца экзаменах, суразмоўнік адзначыў, што ў рэгіёне сфарміравана высокапрафесійная каманда педагогаў. "Вышэйшую і першую кваліфікацыйную катэгорыю маюць 79,5% настаўнікаў. Гэта самы высокі паказчык па рэспубліцы. У нас ёсць усё неабходнае і створаны добрыя ўмовы для атрымання якаснай адукацыі і паспяховага завяршэння навучальнага года", - падкрэсліў начальнік упраўлення, выказаўшы надзею на тое, што дзеці пакажуць добрыя веды.

У Летнім амфітэатры 30 мая адбудуцца канцэрты для старэйшакласнікаў, а 29 мая пройдуць святочныя праграмы для малодшых школьнікаў, падрыхтаваныя Цэнтрам культуры "Віцебск". Выпускныя вечары з яркімі сцэнічнымі праграмамі, вясёлымі сюрпрызамі і традыцыйнай сустрэчай усходу сонца адбудуцца на базе ўстаноў адукацыі і культуры рэгіёну 11 і 12 чэрвеня.

Іван Шчурок адзначыў, што мерапрыемствы завяршэння навучальнага года, правядзенне экзаменаў і выпускных будзе кантралявацца органамі ўлады, спецыялістамі ўпраўлення і аддзелаў адукацыі, прадстаўнікамі органаў унутраных спраў. "Яшчэ раз хочацца нагадаць і бацькам, і педагогам аб тым, што ўсе святочныя мерапрыемствы праходзяць без спіртнога. Дзецям трэба думаць аб працаўладкаванні, паступленні і ўваходзіць у дарослае жыццё. Спіртнога не павінна быць", - настойвае Іван Шчурок.

На пасяджэнні калегіі ўпраўлення адукацыі разглядаліся арганізацыйныя пытанні па правядзенні ў школах свята апошняга званка, арганізацыі летняга адпачынку дзяцей, арганізацыі экзаменаў і выпускных вечароў у школах і інш.