У Віцебскай вобласці прайшлі першыя сходы па стварэнні партыі «Белая Русь»

Беларускае грамадства саспела да развіцця ва ўмовах партыйнай сістэмы. Такое меркаванне выказаў сёння старшыня Віцебскай абласной арганізацыі «Белая Русь» Уладзімір Цярэнтаў на ўстаноўчым сходзе па стварэнні партыі з рабочай назвай «Белая Русь» Віцебскага раёна. 

Паводле яго слоў, фундамент гэтай падзеі закладваўся на працягу трох мінулых дзесяцігоддзяў. І цяперашні крок цалкам абгрунтаваны, перакананы Уладзімір Цярэнтаў:

– Наша грамадства мае патрэбу ў палітычнай партыі, якая аб'яднае ўсе цэнтры сілы, што падтрымліваюць дзяржаву, будзе выказваць нацыянальныя інтарэсы, падтрымліваць палітычны курс краіны і Прэзідэнта.

Аналагічныя сустрэчы прайшлі сёння таксама ў Талачынскім раёне і Першамайскім раёне Віцебска. Іх удзельнікамі сталі члены розных грамадскіх арганізацый, адзначыў Уладзімір Цярэнтаў:

 

– У склад актыву ўвайшлі прадстаўнікі жаночай, моладзевай, ветэранскай і іншых грамадскіх арганізацый. Але стрыжнем сталі члены грамадскай арганізацыі «Белая Русь», якая ініцыявала стварэнне новай партыі. Рабочая версія яе назвы пакуль такая ж – «Белая Русь». Аднак варта дакладна разумець, што «Белая Русь» як грамадская арганізацыя застаецца і будзе існаваць далей. Яе члены, як і раней, будуць займацца рознымі сацыяльнымі праектамі. Тыя ж, хто жадае ўступіць у партыю, каб займацца палітычным будаўніцтвам, могуць прадстаўляць інтарэсы абсалютна розных грамадскіх арганізацый.

Падчас сустрэч удзельнікі вызначыліся з першымі крокамі, якія ім трэба будзе зрабіць на шляху да мэты. У адпаведнасці з заканадаўствам для стварэння новай палітычнай партыі неабходна, каб колькасць яе членаў складала не менш за пяць тысяч, у кожнай вобласці была сфарміравана яе структура, якая ўключае падраздзяленні не менш чым у траціне раёнаў рэгіёна, нагадаў Уладзімір Цярэнтаў:

– Таму на гэтым тыдні паўсюдна ў раёнах мы праводзім зборы па стварэнні ініцыятыўных груп і абіраем дэлегатаў на ўстаноўчы з'езд, які пройдзе 18 сакавіка ў Мінску. Заўтра, напрыклад, аргзборы адбудуцца ў сямі рэгіёнах вобласці, 15 лютага – у 12. Завершацца 16 лютага ў Наваполацку, Расонскім і Сенненскім раёнах. Аналагічныя сустрэчы праходзяць і ў іншых рэгіёнах краіны.

На дадзеным этапе наша асноўная мэта – дакладна вызначыць ключавыя задачы на бліжэйшую перспектыву і падрыхтаваць канкрэтныя прапановы на з'езд, бо статут, праграма і канчатковая назва партыі яшчэ абмяркоўваюцца.

"СБ".