У Віцебскай вобласці расце колькасць зваротаў у службу занятасці на фоне абвешчанай барацьбы з дармаедствам

Службы занятасці Віцебскай вобласці адзначаюць павелічэнне патоку грамадзян, якія хочуць зарэгістравацца ў чарзе на працаўладкаванне на фоне абвешчанай у грамадстве барацьбы з дармаедствам. Пра гэта паведаміла сёння журналістам, адказваючы на пытанне карэспандэнта БЕЛТА, намеснік старшыні камітэта па працы, занятасці і сацыяльнай абароне аблвыканкама - начальнік упраўлення пенсійнага забеспячэння Наталля Хваль перад пачаткам падагульняючай калегіі камітэта.

Па выніках 2014 года сітуацыя на рынку працы характарызавалася зніжэннем колькасці зваротаў за садзейнічаннем у працаўладкаванні і зніжэннем попыту на працоўную сілу (часткова гэта абумоўлена аптымізацыяй штатнага раскладу арганізацый, часткова - запаўненнем вакансій грамадзянамі Украіны). "Але калі на працягу мінулага года мы казалі, што колькасць вакансій пераважае над колькасцю прэтэндэнтаў на іх, то ўжо зараз колькасць вакансій і прэтэндэнтаў зраўнялася. А з улікам таго, што ў грамадстве абмяркоўваецца дэкрэт аб барацьбе з дармаедамі і ўтрыманцамі, мы не толькі чакаем, але ўжо адчуваем, што ўсё больш грамадзян прыходзіць рэгістравацца ў службу занятасці. Мы будзем забяспечваць прадастаўленне дзяржаўных гарантый на працу", - падкрэсліла Наталля Хваль.

У рэгіёне назіраецца павелічэнне ўдзельнай вагі вакансій для высокакваліфікаваных спецыялістаў - з 21% на 1 студзеня 2014-га да 32% на 1 студзеня 2015-га. Ва ўмовах намечанай тэндэнцыі змены структуры попыту на працоўную сілу тым, хто неканкурэнтаздольны на рынку працы, асабліва важна атрымаць прафесію і працаваць.

Па выніках 2014 года ўзровень афіцыйнай беспрацоўнасці ва ўсіх раёнах і гарадах вобласці не перавысіў сацыяльна дапушчальныя параметры і склаў 0,7% колькасці эканамічна актыўнага насельніцтва. Сярэднестатыстычны беспрацоўны ў мінулым годзе - мужчына 40 гадоў, які мае сярэднюю агульную або прафесійна-тэхнічную адукацыю, звольнены па пагадненні бакоў. Для забеспячэння занятасці садзейнічанне ў працаўладкаванні было аказана амаль 27 тыс. грамадзян. Таксама працаўладкавана каля 3 тыс. грамадзян са зніжанай канкурэнтаздольнасцю на рынку працы і 90 беспрацоўных з ліку выпускнікоў на працоўныя месцы па праграме "Маладзёжная практыка". Прафінансаваны і кампенсаваны затраты для стварэння 32 працоўных месцаў для інвалідаў. У межах адаптацыі да працоўнай дзейнасці атрымалі працу 57 інвалідаў. Да аплатных грамадскіх работ прыцягнута 8,3 тыс. чалавек. Арганізавана часовая працоўная занятасць каля 4 тыс. падлеткаў у вольны ад вучобы час, навучанне 1,5 тыс. чалавек. У сельскую мясцовасць на новае месца жыхарства і працы пераселена 84 сям'і беспрацоўных. Рашэннямі аблвыканкама выдзелены бюджэтныя пазыкі для стварэння 34 працоўных месцаў.

На фінансаванне мерапрыемстваў па забеспячэнні занятасці насельніцтва ў мінулым годзе выкарыстана амаль Br40 млрд. У 2015 годзе ставіцца задача працягнуць стымуляванне эканамічнай актыўнасці насельніцтва, садзейнічанне занятасці работнікаў, што вызваляюцца ва ўмовах аптымізацыі штатнага раскладу арганізацый, павышэнне эфектыўнасці выкарыстання працоўных рэсурсаў і інтэграцыю ў працоўную дзейнасць мэтавых груп насельніцтва.

Кацярына Князева