У Віцебскай вобласці суботнік даў старт працоўнай акцыі па добраўпарадкаванні дарог

На Віцебшчыне рэспубліканскі суботнік даў старт работам па добраўпарадкаванні дарог мясцовага значэння. Пра гэта паведаміў журналістам старшыня аблвыканкама Мікалай Шарснёў, адказваючы на пытанне карэспандэнта БЕЛТА, падчас працоўнай акцыі на тэрыторыі мемарыяльнага запаведніка Янкі Купалы ў вёсцы Ляўкі Аршанскага раёна.

Губернатар адзначыў, што суботнік - гэта традыцыйная працоўная акцыя, падчас якой краіна прыводзіць сябе ў парадак. "На Віцебшчыне мы вызначылі два асноўныя напрамкі: калектывы прадпрыемстваў і арганізацый прыводзяць у парадак замацаваныя тэрыторыі, вялікі аб'ём работ запланаваны на дарогах, - сказаў Мікалай Шарснёў. - Унутрыраённыя і ўнутрыгаспадарчыя дарогі знаходзяцца ў непрывабным стане, прыдарожныя палосы заросли дрэвамі і кустамі. Каб выправіць сітуацыю, мы з сённяшняга суботніка даём старт абласной працоўнай акцыі, якая накіравана на добраўпарадкаванне нашых дарог".

Супрацоўнікі аблвыканкама прынялі рашэнне правесці суботнік у Ляўках. "Сёння тут працуе каля 150 чалавек. Мы хочам за дзень прывесці тэрыторыю ў парадак. Потым застанецца падфарбаваць, зрабіць альтанкі, абсталяваць месцы адпачынку, каб гэты аб'ект стаў прывабным для людзей", - падкрэсліў кіраўнік вобласці. Ляўкі звязаны з жыццём і творчасцю Янкі Купалы. Патрапіўшы ў гэтыя мясціны ў 1935 годзе, паэт быў уражаны прыгажосцю краю і прыняў рашэнне пабудаваць сабе дачу на беразе Дняпра. Цяпер у Ляўках размешчаны філіял Дзяржаўнага літаратурнага музея Янкі Купалы (створана дача паэта), вакол музея - мемарыяльны запаведнік плошчай 19 га.

Алена Ціханава - БЕЛТА. Фота Дзмітрыя Восіпава - "Віцебскія весці".