Адначасова з выбарчай кампаніяй у ніжнюю палату парламента набіраюць абароты і выбары ў Савет Рэспублікі Нацыянальнага сходу Рэспублікі Беларусь. 

Цяпер рэгіёны вызначаюцца са сваімі патэнцыяльнымі кандыдатамі ў гэты заканатворчы орган. Так, прадстаўляць абласны цэнтр у верхняй палаце парламента шостага склікання можа быць даверана дырэктару РУП РТЦ «Телерадиокомпания «Витебск» Алене Панцюховай.

На сумесным пасяджэнні прэзідыума Віцебскага гарадскога Савета дэпутатаў і гарвыканкама, якое адбылося 29 ліпеня, наша калега вылучана кандыдатам у члены Савета Рэспублікі ад Віцебска. Чыноўнікі і народныя абраннікі галасавалі аднагалосна за карэнную жыхарку абласнога цэнтра, прафесіянала, які радыкальна ператварыў абласное тэлебачанне і стаяў ля вытокаў стварэння гарадскога тэлеканала, з'яўляючыся яго ідэйным натхняльнікам. Як падкрэсліў старшыня гарвыканкама Віктар Мікалайкін, адным з галоўных крытэрыяў пры выбары кандыдата было выдатнае веданне горада. Акрамя таго, сур'ёзным аргументам на карысць Алены Панцюховай з'яўляецца тое, што яна адбылася як кампетэнтны кіраўнік, пад кіраўніцтвам якога калектыў тэлерадыёкампаніі дасягнуў высокіх вынікаў у прафесійнай дзейнасці.

– Спадзяюся, што Алена Валяр'янаўна на высокім узроўні правядзе выбарчую кампанію і, у выпадку абрання, годна прадставіць абласны цэнтр у Савеце Рэспублікі, дзе будуць запатрабаваны яе вопыт і прафесіяналізм, у тым ліку ў працы на карысць Віцебска, – рэзюмаваў выніковае рашэнне Віктар Мікалайкін.

Алена Панцюхова падзякавала гарадскія ўлады за высокі давер і абяцала яго апраўдаць, прыклаўшы ўсе сілы і магчымасці для дасягнення галоўнай мэты – гарманічнага развіцця абласнога цэнтра.

Усяго Віцебшчыне трэба будзе дэлегаваць у верхнюю палату

парламента 8 чалавек. Вылучэнне кандыдатаў у члены Савета Рэспублікі працягнецца па 19 жніўня ўключна, гэтым правам надзелены прэзідыумы мясцовых Саветаў дэпутатаў базавага ўзроўню і выканкамы. Непасрэдна самі выбары сенатараў пройдуць з 25 жніўня па 13 верасня на пасяджэннях дэпутатаў мясцовых Саветаў дэпутатаў базавага ўзроўню у кожнай вобласці. Вынікі выбараў павінны быць канчаткова падведзены не пазней 30 верасня.

Члены прэзідыума Пастаўскага раённага Савета дэпутатаў і раісп-ка аднагалосна прагаласавалі за вылучэнне кандыдата ў члены Савета Рэспублікі Нацыянальнага сходу Рэспублікі Беларусь Мікалая Мартынава.

– Мы ведаем генеральнага дырэктара таварыства з абмежаванай адказнасцю «Кіруючая кампанія холдынгу «Беларуская гарбарна-абутковая кампанія «Марка» як кампетэнтнага, ініцыятыўнага кіраўніка, умелага арганізатара, які ўнёс важкі ўклад у сацыяльна-эканамічнае развіццё Віцебскай вобласці, – ахарактарызаваў яго намеснік старшыні раісп-ка Юрый Кісялёў.

Мікалай Васільевіч адным з першых у краіне заняўся прадпрымальніцкай дзейнасцю, здолеў стварыць сучаснае высокатэхналагічнае прадпрыемства «Марка», даччыныя вытворчыя структуры, прадукцыя якіх карыстаецца попытам як у Беларусі, так і за яе межамі.

Да яго вопыту працы ў Савеце Рэспублікі, куды Мікалай Мартынаў абіраўся тройчы, звярнуўся старшыня раісп-ка Віктар Гутара. Кіраўнік мясцовай улады прасіў паспрыяць таму, каб у Пастаў, насельніцтва якіх ліш на некалькі дзясяткаў перавышае 20 тысяч, захаваліся льготы малых гарадоў. А дырэктар АТП №17 Алег Малахаў прапанаваў адкрыць у райцэнтры фірменны магазін «Марка».

– Магазін у Паставах можам адкрыць на наступным тыдні, калі для яго знойдзецца месца ў цэнтры горада, – адказаў Мікалай Мартынаў. – Абяцаю прапрацаваць і пытанне статусу Пастаў як малога горада.

Удзельнікі сумеснай пасяджэння органаў улады ў Лепелі аднадушна падтрымалі прапанову старшыні райсавета Мікалая Місюры аб вылучэнні кандыдата ў члены Савета Рэспублікі Нацыянальнага сходу Рэспублікі Беларусь рэктара

Анатоля Шчаснага, рэктара Віцебскага дзяржаўнага медуніверсітэта.

Прадстаўляючы кандыдата, Мікалай Мікалаевіч падкрэсліў, што Анатоль Тадэушавіч узначальвае адну з найбуйнейшых вышэйшых навучальных устаноў краіны, якую, дарэчы, і сам скончыў. Доктар медыцынскіх навук, дацэнт, выдатнік аховы здароўя Рэспублікі Беларусь удастоены ганаровага звання «Чалавек года Віцебшчыны». Гэта здольны і энергічны кіраўнік, дасведчаны, творча мыслячы педагог, таленавіты ўрач. Ён шмат часу ўдзяляе практычнай медыцыне. У 2015 годзе пад непасрэдным кіраўніцтвам Анатоля Шчаснага рэалізаваны праект па перасадцы ныркі, падрыхтаваны высокакваліфікаваны калектыў хірургаў-трансплантолагаў.

Цікавым было і выступленне самога Анатоля Тадэушавіча. Паводле сацапытанняў жыхароў краіны, 70% грамадзян упэўнены, што дабрабыт дзяржавы залежыць у першую чаргу ад моцнага здароўя кожнага і адсутнасці шкодных звычак. Трэба вызначыць найважнейшыя напрамкі ў рабоце, у тым ліку заканадаўчай. Гэта задача і выканаўчай улады, і медыкаў, і педагогаў, а сумесныя праекты і намаганні, упэўнены Анатоль Шчасны, дапамогуць пераламіць сітуацыю. Асабліва ўлічваючы, што на наступныя пяць гадоў ставіцца мэта павялічыць сярэднюю працягласць жыцця да 75 гадоў.

Анатоль Тадэушавіч адказаў і на пытанне, што датычыцца харчавання як састаўной часткі здаровага ладу жыцця. Рэкамендацыі вядомыя, іх пацвярджаюць даследаванні: трэба ўжываць свае, якія растуць у рэгіёне прадукты, сачыць за экалогіяй і чысцінёй вады.

Ад імя ўсіх лепельчан Мікалай Місюра павіншаваў Анатоля Шчаснага з вылучэннем кандыдатам у сенатары.

Сяргей Анто-наў, Тамара Пашкевіч, Алена Целя-тко. «Віцебскія весці».