У Віцебскай вобласці ў чэрвені была арганізавана занятасць 97% асоб, якія стаяць на ўліку ў ІСН

У Віцебскай вобласці ў чэрвені карыснымі відамі дзейнасці былі заняты каля 97% дзяцей, якія стаяць на ўліку ў інспекцыях па справах непаўналетніх (ІСН). Пра гэта паведаміла намеснік старшыні камісіі па справах непаўналетніх Віцебскага аблвыканкама Тамара Аляхновіч.

" лета 2016 года добра спланавана і праходзіць арганізавана. Каля 47 тыс. дзяцей будуць знаходзіцца на аздараўленні ў лагерах, 2,7 тыс. школьнікаў правядуць час у лагерах працы і адпачынку, каля 2 тыс. - у профільных лагерах, уключаючы намётавыя. Гэтыя лічбы прыкладна на ўзроўні мінулага года", - адзначыла Тамара Аляхновіч.

Вялікая ўвага надаецца занятасці дзяцей, якія стаяць на ўліку ў інспекцыі па справах непаўналетніх.

"У рэгіёне такіх каля 1,5 тыс. чалавек. Іх адпачынак спланаваны - гэта і аздараўленне ў лагерах, і арганізаваная працоўная занятасць, і індывідуальнае працаўладкаванне. Так, у чэрвені 97% тых, хто стаіць на ўліку, былі заняты карыснымі відамі дзейнасці. У ліпені і жніўні гэтая лічба некалькі знізіцца, паколькі паменшыцца колькасць лагераў. Мы арыентуем усіх на тое, што трэба ўзмацніць працу па працаўладкаванні старэйшых школьнікаў і навучэнцаў сістэмы прафтэхадукацыі", - сказала Тамара Аляхновіч.

Пры садзейнічанні службаў занятасці сёлета будуць працаўладкаваны каля 4 тыс. дзяцей. Для арганізацыі паўнавартаснага адпачынку дзяцей сем'ям аказваецца матэрыяльная падтрымка. "З улікам патрэбы ў аздараўленні і занятасці прадугледжана датацыя з боку дзяржорганаў, бюджэту. У рэгіёнах, дзе ёсць сем'і, якія асабліва маюць патрэбу ў падтрымцы, бацькоўскую даплату за пуцёўкі дапамагаюць кампенсаваць выканкамы. Да прыкладу, у Бешанковіцкім і Дубровенскім раёнах сем'і могуць адправіць дзяцей у лагер пры мінімальнай даплаце", - адзначыла намеснік старшыні камісіі. Сёння ў Віцебску прайшло сумеснае пасяджэнне абласнога каардынацыйнага савета па кантролі над рэалізацыяй дэкрэта №18 "Аб дадатковых мерах па дзяржаўнай абароне дзяцей у неспрыяльных сем'ях" і камісіі па справах непаўналетніх аблвыканкама.

Алена Ціханава - БЕЛТА.