У Віцебскай вобласці ў сакавіку выдадзена на 2,4 тыс. больш пашпартоў

5 красавіка, Віцебск /Дзіяна Курыло - БЕЛТА/. Службы па грамадзянстве і міграцыі Віцебскай вобласці ў сакавіку бягучага года выдалі на 2,4 тыс. пашпартоў больш, чым у сакавіку 2009 года, паведаміла карэспандэнту БЕЛТА начальнік упраўлення па грамадзянстве і міграцыі УУС Віцебскага аблвыканкама Таццяна Рамашова. У цэлым у першым квартале 2010 года больш за 20 тыс. жыхароў абласцей атрымалі новыя дзяржаўныя дакументы, што сведчаць асобу. Рост выдачы пашпартоў тлумачыцца змяненнем правіл уезду ў краіны Еўрасаюза і актыўнай інфармацыйнай кампаніяй, якую працягваюць абласныя службы па грамадзянстве і міграцыі. Спецыялісты вядуць тлумачальную працу праз СМІ, сустракаюцца з працоўнымі калектывамі і актыўна адказваюць на званкі грамадзян. Адказ на часта сустракаемыя пытанні можна знайсці на афіцыйных сайтах МУС і УУС Віцебскага аблвыканкама. Упраўленне па грамадзянстве і міграцыі УУС аблвыканкама звяртае ўвагу ўсіх, хто мае намер выехаць у дзяржавы ЕС, загадзя пры неабходнасці абмяняць галоўны дакумент. Да таго ж традыцыйна ў красавіку-чэрвені пачынаецца наплыў 16-гадовых грамадзян, якія ўпершыню атрымліваюць пашпарт і імкнуцца гэта зрабіць да моманту рэгістрацыі на цэнтралізаванае тэсціраванне. Між тым павелічэння штатаў і дадатковай тэхнічнай падтрымкі ў падраздзяленнях па грамадзянстве і міграцыі не будзе. Зараз у Віцебскай вобласці атрымаць або абмяняць пашпарт можна на працягу двух тыдняў, хоць заканадаўствам вызначаны больш працяглы тэрмін выдачы дакумента - да аднаго месяца. У 2009 годзе службы па грамадзянстве і міграцыі вобласці выдалі 84,2 тыс. пашпартоў. Як паведамлялася БЕЛТА, з 5 красавіка 2010 года ўступае ў сілу новы Візавы кодэкс Еўрапейскага саюза. Згодна з арт.12 гэтага дакумента, грамадзяне Беларусі павінны будуць у'язджаць у ЕС з пашпартамі, якія ўтрымліваюць як мінімум дзве чыстыя старонкі. Тэрмін дзеяння пашпарта павінен заканчвацца не раней чым праз тры месяцы пасля меркаванай даты выезду з ЕС. Калі ж грамадзянін аформіў візу для шматразовых паездак, то тэрмін дзеяння павінен заканчвацца не раней чым праз тры месяцы пасля апошняй меркаванай даты выезду з тэрыторыі дзяржавы - члена Еўрасаюза. Таксама пашпарт павінен быць выдадзены не больш за 10 гадоў таму. -0-