У Віцебскай вобласці за 7 месяцаў узбуджана 34 крымінальныя справы ў дачыненні да ілжэпрадпрымальніцкіх структур

10 верасня, Віцебск /Дзіяна Курыла - БЕЛТА/. Інвентарызацыя суб'ектаў гаспадарання пройдзе ў Віцебскай вобласці. Старшыня Віцебскага аблвыканкама Аляксандр Косінец запатрабаваў сёння на пасяджэнні абласнога выканаўчага камітэта ўзмацніць работу праваахоўных органаў па забеспячэнні эканамічнай бяспекі, перадае карэспандэнт БЕЛТА. Праваахоўным органам сумесна з камітэтам эканомікі аблвыканкама даручана праверыць, ці сапраўды ўсе, 7413 зарэгістраваных у вобласці суб'ектаў гаспадарання, ажыццяўляюць сваю дзейнасць. За 7 месяцаў бягучага года выяўлена 34 прадпрыемствы, якія ніякай дзейнасці не вялі. Па дадзеных упраўлення Дэпартамента фінансавых расследаванняў КДК па Віцебскай вобласці, у студзені-ліпені ўзбуджана 34 крымінальныя справы ў дачыненні да ілжэпрадпрымальніцкіх структур. Выяўленая шкода ад іх дзейнасці склала каля Br15 млрд. Акрамя таго, супрацоўнікі дэпартамента выяўляюць так званыя фірмы-прысоскі, якія працуюць з аднымі і тымі ж дзяржаўнымі прадпрыемствамі. Кіраўнікі такіх структур, выкарыстоўваючы свае асабістыя сувязі і нестабільнае фінансавае становішча дзяржпрадпрыемстваў, спрабуюць узбагаціцца і пры гэтым не плацяць падаткі. Так, устаноўлены падобныя факты ў дачыненні да суб'ектаў гаспадарання, якія ажыццяўлялі фінансава-гаспадарчую дзейнасць з ААТ "КІМ". Незаконная прадпрымальніцкая дзейнасць дазволіла атрымаць прыбытак у суме больш Br360 млн., а шкода ад іх дзейнасці перавысіла Br400 млн. У дачыненні да дадзеных фірмаў узбуджана 10 крымінальных спраў. За 2008 год УДФР КДК па Віцебскай вобласці было ўзбуджана 49 крымінальных спраў у дачыненні да ілжэпрадпрымальніцкіх структур.-0-