У Віцебскай вобласці за ходам галасавання сочаць звыш 2,7 тыс. назіральнікаў

25 красавіка, Віцебск /Сяргей Кочатаў - БЕЛТА/. У Віцебскай вобласці за ходам галасавання сочаць звыш 2,7 тыс. назіральнікаў, з іх непасрэдна на ўчастках для галасавання - больш за 2,6 тыс. Пра гэта карэспандэнту БЕЛТА паведаміў старшыня абласной выбарчай камісіі Уладзімір Мядзец. Найбольшую цікавасць да назірання за ходам галасавання праявілі грамадскія арганізацыі, якія дэлегавалі больш за 1,6 тыс. сваіх актывістаў для працы ў камісіях рознага ўзроўню. Амаль 960 назіральнікаў прадстаўляюць працоўныя калектывы, крыху больш за 30 назіральнікаў вылучаны палітычнымі партыямі. Пры гэтым найбольшую актыўнасць назіральнікі праявілі ў асноўны дзень галасавання. Паводле даных на 22 красавіка, выбаркамамі было акрэдытавана каля 2 тыс. назіральнікаў, адзначыў Уладзімір Мядзец. Усяго ў Віцебскай вобласці трэба выбраць 3530 дэпутатаў, у тым ліку 60 - абласнога Савета, 713 - раённых, 195 - гарсаветаў гарадоў абласнога і раённага падпарадкавання, а таксама 2562 - Саветаў першаснага ўзроўню (сельскіх і пасялковых). -0-