У Віцебскай вобласці запланавана маштабная мадэрнізацыя жывёлагадоўчай галіны
Заданне на пяцігодку
Па словах першага намесніка старшыні камітэта па сельскай гаспадарцы і харчаванні аблвыканкама Уладзіміра Машэра, цяпер на Віцебшчыне 130 абсталяваных даільнымі заламі і рабатызаваных малочнатаварных ферм, што складае 17,6% ад агульнай колькасці. У мінулым годзе ў сярэднім на карову атрымана каля 4 тыс. кг малака. На МТФ з даільнымі заламі гэты паказчык быў вышэй на 20%, а на рабатызаваных набліжаўся да 7 тыс. кг (цяпер на іх у дзень атрымліваюць ад каровы не менш за 20 кг). Таму востра неабходна мадэрнізацыя жывёлагадоўлі.
У бягучым годзе будуць уведзены ў эксплуатацыю дзевяць МТФ, дзве ўжо ўзведзены: рабатызаваная і з даільным залам. Пачата будаўніцтва яшчэ трох сучасных ферм, на якіх плануецца ўтрымліваць ад 1200 да 2000 кароў. Усяго да 2024 года плануецца ўзвесці дзевятнаццаць падобных аб'ектаў на 30,5 тыс. галоў. Належная ўвага надаецца і рэканструкцыі старых ферм, у бягучым годзе абнавілі больш за 30 жывёлагадоўчых аб'ектаў.
Нягледзячы на наступствы няўраджаю 2018-га, недахоп фуражнага збожжа, бялковай сыравіны ў стойлавы перыяд і вясной 2019-га, у восеньскія месяцы дасягнута станоўчая дынаміка ў вытворчасці малака. На дадзены момант у сярэднім на карову надоена 3321 кг малака, што на 15 кг перавышае аналагічны перыяд мінулага года.
На працягу шэрагу гадоў нарошчваецца вытворчасць малака на сучасным МТК у СПК «Ларынаўка» Аршанскага раёна. За 2018-ы тут на карову атрымана 10 835 кг, сёлета гаспадарка перавысіць рубеж у 11 тыс. кг. Гэты паказчык не толькі адзін з самых высокіх у краіне, але і адпавядае сусветнаму. У ААТ «Шайцерава» Верхнядзвінскага раёна на МТФ, абсталяваных звычайным малакаправодам, за 2018-ы надоена на карову 8482 кг малака з прыбаўкай да 2017-га ў 568 кг. На аналагічным абсталяванні ў ААТ «Новыя Гараны» Полацкага раёна за той жа перыяд атрымана 7434 кг (плюс 355 кг да 2017-га). Добра сябе зарэкамендавалі рабатызаваныя фермы. У ліку лепшых – у СХП «Мазалавагаз» Віцебскага раёна, УП «Каралі» Глыбоцкага, філіяла «Вясна-энерго» Полацкага, ААТ «Хатылы-Агра» Пастаўскага. За 10 месяцаў гэтага года надой на карову тут складае ад 7 да 9 тыс. кг.
Свінагадоўля выходзіць на ўзровень
Пераадолена неспрыяльная эпізаатычная сітуацыя, якая ўзнікла ў 2013 годзе. Нягледзячы на некаторае зніжэнне колькасці пагалоўя гэтага віду жывёл, за кошт павышэння эфектыўнасці галіны перавышаны ўзровень 2012-га па вытворчасці свініны. Сярэднясутачныя прывесы адпавядаюць патрабаванням тэхналагічнага рэгламенту і за 10 месяцаў 2019-га склалі 630 г, што на 3,4% вышэй мінулага года. У Браслаўскім, Верхнядзвінскім, Талачынскім раёнах паказчык наблізіўся да 700 г, у Лепельскім і Чашніцкім перавысіў 900 г.
Для развіцця свінагадоўлі сумесна з ізраільскай кампаніяй у Лёзненскім раёне пачата будаўніцтва новага рэпрадуктара па атрыманні парасят на 5 тыс. свінаматак. Завяршаецца распрацоўка праектнай дакументацыі на ўзвядзенне аналагічнага аб'екта на Аршаншчыне. Гэта дазволіць значна павысіць эфектыўнасць атрымання парасят для комплексаў па адкорме свіней і павялічыць вытворчасць мяса.
Запатрабаваная індычка
Нягледзячы на сур'ёзную канкурэнцыю з боку суседніх краін і ў першую чаргу Расіі, на Віцебшчыне павялічваецца пагалоўе птушкі (на
1 лістапада было больш за 6,5 млн галоў). У тым ліку індыкі (сярэднемесячная колькасць 36,4 тыс.). Рэнтабельнасць мяса гэтага віду птушкі ў ААТ «Птушкафабрыка Гарадок» складае 15%, яно запатрабавана на ўнутраным і знешнім рынках, бо з'яўляецца дыетычным і вельмі карысным для здароўя.
У гэтым годзе выраблена 332,6 млн яек, што на 20,8 млн больш за леташні. З пачатку 2019-га на 13% узрасла яйценоскасць курэй-нясушак і склала 235 штук.
Гонар за працу
Стала добрай традыцыяй штогод на абласным узроўні ўшаноўваць перадавікоў галіны. Па выніках 2018-га ў сваіх прафесіях лепшымі былі прызнаны 148 працаўнікоў, у тым ліку 52 аператары машыннага даення. Сярод іх Ларыса Ісаковіч з СПФ «Заазер'е» Лепельскага раёна (надаіла на карову 9531 кг), Валянціна Хадкевіч з ААТ «Шайцерава» Верхнядзвінскага раёна (9178 кг), шматдзетная маці Таццяна Світко з КУСГП ім. Чарняхоўскага Дубровенскага раёна (6651 кг) і многія іншыя. Аналагічныя ўшанаванні праводзяцца і на раённым узроўні.
Дарогу маладым
Тры гады таму распараджэннем аблвыканкама зменена сістэма аплаты працы спецыялістаў у сельскай гаспадарцы. Новая схема стымулюе да павышэння эфектыўнасці працы і вытворчасці. Напрыклад, загадчык фермай, заатэхнікі, ветурачы пры выкананні і перавышэнні даведзеных паказчыкаў (выхад цялят, сярэднясутачныя прывагі, павелічэнне вытворчасці малака і г. д.) маюць магчымасць зарабляць да 2 тыс. руб. і больш. Гэта датычыцца і маладых спецыялістаў, замацаванасць якіх за апошні год павялічылася на два працэнтныя пункты і складае 53%. У 2019-м колькасць кіраўніцкіх кадраў і спецыялістаў сельскагаспадарчых арганізацый ва ўзросце да 31 года складае 1740 чалавек, або чвэрць ад агульнай колькасці. У якасці прыкладу можна прывесці галоўнага заатэхніка Кацярыну Антановіч і галоўнага агранома Уладзіміра Міхайлава з ПК «Альгоўскае» Віцебскага раёна. Шмат у чым дзякуючы іх працы штогадовы надой на карову ў гаспадарцы перавышае 6 тыс. кг, ураджайнасць капусты ў 2019-м пераваліла за 800 ц/га.
Вядзецца планамерная праца па падборы прафесійна арыентаваных абітурыентаў, знаёмых з сельскім укладам жыцця і вытворчасцю, для паступлення ў аграрныя ўстановы адукацыі, заключэнне мэтавых дагавораў (за шэсць гадоў іх колькасць павялічылася на 15,4%). У перыяд навучання навучэнцы і студэнты праходзяць практыку ў базавых, эфектыўна працуючых і якія валодаюць перадавым вопытам сельгаспрадпрыемствах (у спісе 99 гаспадарак). Зараз у школах Віцебшчыны дзейнічаюць 30 аграрных класаў, першы выпуск адбудзецца ў 2020-м.
Уладзімір Машэра адзначыў, што, улічваючы важнасць для сельскагаспадарчай галіны кваліфікаваных кадраў, на пастаянным кантролі ўладаў знаходзіцца іх якасны склад, замацаванне маладых спецыялістаў і забеспячэнне іх жыллём, павышэнне прафесійнага ўзроўню і матэрыяльнай зацікаўленасці.