У Віцебскай абласной арганізацыі ГА «Беларускі саюз жанчын» стварылі моладзевае крыло і выбралі яго лідара

Стварэнне моладзевага крыла са сваім лідарам – ініцыятыва менавіта рэгіянальнага аддзялення, якая атрымала падтрымку на рэспубліканскім узроўні. Як паведаміла старшыня абласной арганізацыі БСЖ Алена Мартынава, на дадзены момангт моладзь складае каля 30% ад агульнай колькасці членаў, і гэты працэнт паступова расце. Арганізаваны пярвічкі ў мясцовых ВНУ і каледжах. Аб’ядноўваючым звяном і стане абраны моладзевы лідар, які будзе прадстаўляць інтарэсы і ідэі сваіх аднагодкаў у жаночым савеце.

– Важна, каб шэрагі арганізацыі прырасталі ініцыятыўнымі прадстаўніцамі сучаснай моладзі, каб яны разам з намі ўдзельнічалі ва ўмацаванні роднай краіны, сацыяльных праектах, развівалі і папулярызавалі актыўную грамадзянскую пазіцыю, ідэі дабра, чуласці, любові да сям’і, радзімы. Акрамя таго, пры Беларускім саюзе жанчын створана «Школа паспяховага лідарства», у якой дзяўчаты з лідарскімі якасцямі маглі б паўдзельнічаць, і гэты вопыт, лічу, спатрэбіцца ім для далейшай кар’еры. Ну і вядома, хочам пачуць ад моладзі новыя ініцыятывы, прапановы, якія будуць цікавыя іх пакаленню, – падзялілася чаканнямі Алена Валер’еўна.

Лідара моладзевага крыла прадставілі на пасяджэнні праўлення абласной арганізацыі БСЖ, якое адбылося ў ВДУ ім. П. Машэрава, што невыпадкова. Марыя Сакуноўская, якая цяпер прадстаўляе інтарэсы моладзі ў жаночай арганізацыі, вучыцца ў гэтай жа ВНУ на хіміка-біёлага. Другакурсніца ўваходзіць у Школу лідараў «Машэраўцы», узначальвае студэнцкі савет на сваім факультэце, гуляе ў КВЗ, спявае, танцуе, удзельнічае ў валанцёрскіх акцыях, дапамагае старым і бяздомным жывёлам… Увогуле, спіс інтарэсаў і захапленняў студэнткі можна пералічваць доўга.

– Пра Беларускі саюз жанчын, натуральна, чула, але для мяне асабіста гэта новы напрамак і вялікі гонар. Дзякуючы сяброўству ў арганізацыі разлічваю як мінімум лепш даведацца правы і гарантыі, якія сёння прадугледжаны для жанчын у нашай дзяржаве, пазнаёміцца з цікавымі людзьмі. Як сапраўднаму патрыёту, мне хацелася б папулярызаваць беларускую нацыянальную культуру і мову сярод аднагодкаў, у тым ліку і з дапамогай жаночай арганізацыі, новых праектаў, да якіх больш актыўна далучыць моладзь, – сказала Марыя.

А праектаў і мерапрыемстваў, дзе дзяўчаты могуць праявіць сябе, сёлета жаночым саветам Віцебшчыны запланавана нямала. Так, ужо стартаваў чэлендж у сацыяльных сетках #ямыпомним, у якім маладыя людзі дзеляцца сваімі ўражаннямі ад сустрэч з ветэранамі Вялікай Айчыннай вайны, пачутых гісторый і подзвігаў мінулых гадоў.

Адно з найбліжэйшых мерапрыемстваў – акцыя па навядзенні парадку на месцах пахаванняў мастакоў, пісьменнікаў і іншых дзеячаў культуры паўночнага рэгіёну. Старт будзе пакладзены ў Бешанковіцкім раёне, затым эстафету падхопяць і іншыя рэгіёны.

Творчыя таленты можна будзе праявіць у конкурсе эсэ «Мы розныя, але мы разам», прымеркаваным да Дня Незалежнасці Рэспублікі Беларусь і Года народнага адзінства, а таксама ў конкурсе на лепшы праект білборда да 30-годдзя Беларускага саюза жанчын.

Віцебская абласная арганізацыя БСЖ цяпер ужо пры актыўным удзеле моладзевага крыла мае намер і далей умацоўваць імідж жаночага савета, які пазнаецца па справах, напоўненых жаночай прыгажосцю, дабром, чуласцю, міралюбнасцю, што аб'ядноўваюць беларусак розных пакаленняў.

"Віцебскія весці".