У Віцебскім раёне перапахавалі астанкі 50 безыменных салдат
Раскопкі на месцы гібелі салдат стралковых дывізій 11-й Гвардзейскай арміі, 43-й Арміі і 4-й Ударнай арміі ішлі ў жніўні, і праца ўскладнялася спёкай. "Паблізу Заронава ў студзені 1944 года ішлі баі за вызваленне Віцебска. У жніўні мы вялі раскопкі на месцы, дзе ў той час былі жорсткія баі. На жаль, не знайшлі імянных прадметаў, гэтыя салдаты засталіся безыменнымі. У наступным годзе ў тым жа складзе мы вернемся ў гэтыя мясціны і працягнем раскопкі, бо тут яшчэ шмат працы", - распавёў старшыня праўлення маскоўскай абласной грамадскай арганізацыі "Дабрачынны ваенна-гістарычны пошукавы клуб "Памяць і прымірэнне" Валерый Загрэкаў.
Валерый Загрэкаў
З расійскімі пошукавікамі працавалі служачыя 52-га спецыялізаванага пошукавага батальёна Узброеных Сіл Беларусі, кадэты з Масквы і Полацка. "Для мяне было справай гонару прыняць удзел у раскопках, бо кіраўніцтва нашага вучылішча адбірала для працы лепшых з лепшых. Я памятаю, як у першы дзень мы знайшлі астанкі салдата. Гэта быў вельмі запамінальны і кранальны момант. На раскопках разумееш, наколькі жорсткія баі ішлі ў гады Вялікай Айчыннай вайны, колькі чалавек загінула, якой цаной дасягалася Перамога. Гэта ўрок нам, нашчадкам. Асабіста мне хацелася не проста знайсці загінулых воінаў, а даведацца іх імёны, каб адшукаць потым і расказаць пра гэта іх родным", - падзяліўся кадэт Полацкага кадэцкага вучылішча Уладзіслаў Пыльнікаў.
Яе "калега" з Масквы, старшая кадэтка школы №760 імя А.П.Мярэсьева Ангеліна Ягорава прыехала ў Віцебскі раён па прапанове класнага кіраўніка, які ў свой час дапамог адшукаць ёй звесткі аб прадзедах, што ўдзельнічалі ў Вялікай Айчыннай вайне. Пасля вывучэння баявога шляху родных дзяўчына зацікавілася ў цэлым пошукавай дзейнасцю і ахвотна адгукнулася на прапанову папрацаваць на месцы раскопак у Заронаве. "Мы пражывалі ў палатках, дапамагалі даставаць астанкі салдат з зямлі, знаходзілі таксама кацялкі, гільзы. Гэта велізарны досвед і святая справа, якую нельга пакідаць, таму што гэта наша памяць. Гэта тая частка нашай гісторыі, якая аддаецца болем у сэрцах кожнага пакалення", - адзначыла Ангеліна.
На Заронаўскім мемарыяле, дзе знайшлі апошняе спачын безназоўныя воіны, пахавана больш за 10,5 тыс. астанкаў салдат Савецкай арміі. У 2021-2022 гадах тут праводзілі рамонтныя работы, на якія з раённага і абласнога бюджэтаў накіравана Br177 тыс. "На гэтай брацкай магіле вырашылі праводзіць рамонт не паэтапна, а адразу выканаць комплекс работ. Дзякуючы праведзеным суботнікам удалося сабраць неабходныя сродкі, да важнай працы па ўвекавечанні памяці загінуўшых воінаў далучыліся і раённыя ўлады. На 136 мемарыяльных плітах тут нанесены 30,5 тыс. імёнаў, з іх больш за тысячу новых", - падкрэсліў старшыня абласнога Савета дэпутатаў Уладзімір Церанцьеў.
Уладзімір Церанцьеў
Прысутныя на цырымоніі пахавання прадстаўнікі раённай і абласной улады, праваахоўных органаў, пошукавікі, вайскоўцы, моладзь і ветэраны ўшанавалі памяць загінулых хвілінай маўчання.-0-
Ігар Лісоўскі
