Велапаркоўкі з сонечнымі панэлямі ўсталююць у Полацку па праекце «Зялёныя гарады»
ВелапарKоўкі з сонечнымі панэлямі будуць устаноўлены на агляднай пляцоўцы ў раёне Сафійскага сабора па вул. Ніжне-Пакроўскай, каля помніка Усяславу Чарадзею на скрыжаванні вуліц Кастрычніцкай і Еўфрасінні Полацкай; у скверы насупраць будынка "Белдзяржстрах" у раёне гармат, у скверы па пр. Ф. Скарыны ў раёне капліцы загінулым у Афганскай вайне; каля спартыўнага клуба "Феникс" па вул. Багдановіча, 3. Працэс устаноўкі зойме каля месяца, крайні тэрмін - 15 сакавіка.
"Спецыялісты па сучасным гарадскім развіцці ўсё часцей звяртаюцца да аднаўляльных крыніц энергіі (А.К.Э.). Прыкладамі, узорамі для пераймання становяцца гарады, якія шукаюць недарагія, экалагічныя і надзейныя крыніцы энергіі, выбіраюць шлях разумнага і зялёнага развіцця. Полацк у іх ліку. Тут разглядаюць А.К.Э. як неад'емную частку гарадскіх стратэгій", - адзначыў Руслан Хількевіч.
Сонечная панэль - гэта бясплатная і невычарпальная крыніца энергіі, а таксама адсутнасць экалагічнай шкоды для навакольнага асяроддзя. Дзякуючы іх выкарыстанню на новых велапаркоўках можна будзе зарадзіць мабільны тэлефон, планшэт, партатыўны камп'ютар. Канструкцыя такой велапарKоўкі мае лаканічны, стыльны знешні выгляд. Яны арганічна ўпішуцца ў гарадское асяроддзе.
На сённяшні дзень агульная працягласць веладарожак у Полацку складае 15 км, з якіх 6,5 км пабудавана па праекце "Зялёныя гарады".
Праект фінансуецца Глабальным эканамічным фондам і выконваецца Праграмай развіцця ААН у партнёрстве з Міністэрствам прыродных рэсурсаў і аховы навакольнага асяроддзя. Мэта - больш шырокае развіццё планаў зялёнага горадабудаўніцтва і рэалізацыя пілотных ініцыятыў, звязаных з павышэннем энергаэфектыўнасці і ўстойлівым транспартам у малых і сярэдніх гарадах Беларусі.