Венгерская дабрачынная арганізацыя праспонсіруе стварэнне рэабілітацыйнага цэнтра для былых зняволеных у Гарадоцкім раёне
Віцебшчыну наведала амбасадар добрай волі дабрачыннай арганізацыі «Венгерская межцерковная помощь», жонка прэм’ер-міністра Венгрыі Аніко Леваи.
Візіт спадарыні Аніко Леваи працягнуўся два дні. У дэлегацыю таксама ўваходзілі прэзідэнт-дырэктар «Венгерской межцерковной помощи» Ласла Лехель, Надзвычайны і Паўнамоцны Пасол Венгрыі ў Беларусі Вільмаш Сіклавары, іншыя прадстаўнікі дыпмісіі і дабрачыннай арганізацыі.
Сімвалічна, што прыезд царкоўнай гуманітарнай місіі на Віцебшчыну супаў з правядзеннем у Мінску IV Еўрапейскага праваслаўна-каталіцкага форуму, на якім ішла размова аб захаванні хрысціянскіх каштоўнасцей і сумеснымі намаганнямі царквы і дзяржавы ў рэсацыялізацыі людзей, якія апынуліся ў складаных жыццёвых сітуацыях.
– У нашай арганізацыі ёсць вялікі вопыт у гэтым напрамку, і мы хацелі б ім падзяліцца з беларусамі, – сказаў спадар Ласла Лехель.
У прыватнасці, гаворка ідзе аб стварэнні ў вёсцы Сяло Гарадоцкага раёна на базе манастырскага падворка рэабілітацыйнага цэнтра для былых зняволеных. Аналагічныя праекты рэалізуюцца таксама ў Гродне і Гомелі. «Венгерская межцерковная помощь» плануе накіраваць на гэтыя мэты каля 250 тыс. еўра. Як растлумачыў Мікалай Матрунчык, дырэктар міжканфесійнай місіі «Хрысціянскае сацыяльнае служэнне», якая прадстаўляе ў міжнародным праекце беларускі бок, у цэнтры будуць займацца жывёлагадоўляй і зборам лекавых траў. У найбліжэйшы час тут усталююць адпаведнае абсталяванне і запросяць спецыялістаў. Гэта першы сумесны праект у сферы рэабілітацыі людзей, якія апынуліся ў складаным сацыяльным становішчы.
Рэсацыялізацыя асобы – складаны працэс, які ўключае комплекс духоўна-маральных, прававых, арганізацыйных, псіхалагічных, выхаваўчых і іншых мер уздзеяння на былых асуджаных. І без сумес ных намаганняў усіх сацыяльных інстытутаў цяжка будзе дасягнуць станоўчых вынікаў, падкрэсліў Мікалай Матрунчык. Пакуль больш за 60% асуджаных у Беларусі пасля вызвалення зноў уступаюць на шлях злачыннасці.
Пра гэта гаварылася і на сустрэчы венгерскай дэлегацыі з першым намеснікам старшыні аблвыканкама Генадзем Грэбневым і намеснікам старшыні Уладзімірам Церанцьевым.
У ходзе гутаркі госці даведаліся аб эканамічным, сацыяльным і культурным патэнцыяле Віцебшчыны, намяцілі перспектывы супрацоўніцтва. За першы квартал гэтага года тавараабарот паміж нашай вобласцю і Венгрыяй склаў усяго 4 млн долараў, да гэтага часу няма ні аднаго прадпрыемства з венгерскім капіталам.
Стан спраў трэба мяняць – да такой высновы прыйшлі Генадзь Грэбнеў і спадар Вільмаш Сіклавары. Крокам насустрач стане ўдзел віцебскай дэлегацыі ў эканамічным форуме, які плануецца правесці ў кастрычніку, і намечаных на дваццатыя чысла чэрвеня Днях культуры Венгрыі ў Мінску, а таксама запрашэнне Вільмаша Сіклавары на «Славянскі базар у Віцебску», у рамках якога наладжваюцца не толькі культурныя, але і дзелавыя кантакты.
У канцы сустрэчы спадарыня Аніко Леваі падзялілася ўражаннямі аб Віцебску:
– Гуляючы па горадзе, я сустрэла шмат маладых мам з каляскамі. Для мяне, маці пяцярых дзяцей, гэта вельмі прыемна і добры знак таго, што дзяржава квітнее.
Яна таксама выказала надзею, што сяброўскія адносіны паміж нашымі краінамі не скончацца пасля завяршэння двухгадовага праекта.
Таццяна Пастэрнак, "Віцебскія весці"