Верхнядзвінскія камбайнеры першымі ў Віцебскай вобласці сярод маладзёжных экіпажаў намалацілі 1 тыс. т

5 жніўня, Віцебск /Сяргей Кочатаў - БЕЛТА/. Маладыя камбайнеры з ААТ "Прудзінкі" Верхнядзвінскага раёна першымі ў Віцебскай вобласці сярод маладзёжных экіпажаў намалацілі тысячу тон збожжа ў ходзе ўборачнай кампаніі, паведамілі карэспандэнту БЕЛТА ў аддзеле па справах моладзі аблвыканкама.

Экіпаж у складзе Сяргея Гапановіча і Аляксея Пілюшына на камбайне КЗС-1218 скасілі больш за 220 га і намалацілі крыху больш за 1 тыс. тон (па дадзеных на 5 жніўня). Такім чынам, верхнядзвінскія камбайнеры сталі першымі пераможцамі абласнога аператыўнага спаборніцтва сярод маладых удзельнікаў (да 31 года) уборачнай кампаніі, абвешчанага аддзелам па справах моладзі аблвыканкама і абкамам прафсаюза работнікаў АПК. Ім будуць уручаны дыпломы і каштоўныя падарункі.

Усяго на ўборцы збожжавых і зернебабовых у вобласці працуюць больш за 200 маладзёжных экіпажаў камбайнаў, пры гэтым больш за ўсё моладзі занята ў Лёзненскім (18 маладзёжных экіпажаў), у Віцебскім і Пастаўскім раёнах (па 17 экіпажаў), а таксама ў Аршанскім і Дубровенскім раёнах (па 16 экіпажаў).

Па дадзеных на 5 жніўня, у вобласці збожжавыя культуры скасілі на плошчы звыш 215 тыс. га, або 47,5% ад плошчаў, якія падлягаюць уборцы. Намалочана каля 690 тыс. т збожжа пры сярэдняй ураджайнасці 32,1 ц/га. Піваварны ячмень убраны з плошчы 7,4 тыс. га, або 30,5% да плана, намалочана звыш 21,7 тыс. т пры сярэдняй ураджайнасці 29,3 ц/га.-0-