Верхнядзвінскі масласырзавод прыняў удзел у Міжнародным сырным форуме

Мерапрыемства, якое аб'яднала вытворцаў сыроў з усёй Беларусі, нядаўна адбылося ў Мінску. Як паведаміла начальнік аддзела збыту і забеспячэння ААТ «Верхнядзвінскі масласырзавод» Святлана Цыро, на сустрэчы абмяркоўваліся інавацыі ў пытаннях тэхналогіі вытворчасці, якасці, бяспекі харчовых прадуктаў, сертыфікацыі, навіны заканадаўства.

Вялікую ўвагу ўдзелілі перспектывам экспарту вырабаў айчынных сыраробаў. У прыватнасці, прадстаўнікі расійскага Нацыянальнага саюза вытворцаў малака «Саюз малако» расказалі аб асаблівасцях дзейнасці беларускіх прадпрыемстваў ва ўмовах Мытнага саюза. Гутарка ішла таксама аб стане малочнага рынку Еўропы і тэндэнцыях яго развіцця.

– Для нас гэтая інфармацыя аказалася карыснай, бо 60% аб'ёму вырабленай прадукцыі мы рэалізуем на экспарт. Таму важна ведаць рэаліі сённяшняга дня, каб стабільна прысутнічаць на замежным рынку. Гэта дапаможа замацаваць наяўныя пазіцыі і знайсці новыя рынкі збыту, – адзначыла Святлана Цыро.

Акрамя Расіі, ААТ «Верхнядзвінскі масласырзавод» рэалізуе сваю прадукцыю ў Казахстан і Кітай. Нагадаем, гэта адно з нямногіх беларускіх прадпрыемстваў, якія маюць сертыфікаты якасці Еўрасаюза.

Вольга Маслоўская, "Віцебскія весці"