Вясеннія прэм'еры музычных спектакляў падрыхтавала для юных слухачоў Віцебская філармонія

13 сакавіка, Віцебск /Сяргей Кочатаў - БЕЛТА/. Серыя вясновых прэм'ер чакае юных віцябчан, для якіх Віцебская абласная філармонія падрыхтавала тры новыя музычныя прадстаўленні. Аб гэтым карэспандэнту БЕЛТА паведаміла мастацкі кіраўнік філармоніі Нелі Мацаберыдзэ. Першым вясновым сюрпрызам стане прэм'ера музычнай казкі выдатнага рускага кампазітара Барыса Чайкоўскага "Ласкуцік і воблака", створанай па матывах літаратурнага твора Сафіі Пракоф'евай. У аснове сюжэта казкі апавяданне аб кранальнай дружбе дзяўчынкі па імені Ласкуцік і Воблака, аб вечным супрацьстаянні дабра і зла, з якога дабро абавязкова выходзіць пераможцам. Дзеянне адбываецца ў адным казачным каралеўстве. Цудоўная музыка дае магчымасць раскрыць унутраныя перажыванні герояў, стварае іх музычныя партрэты і захоплівае дзіўнай драматургіяй, якая ў сваю чаргу дапамагае слухачам пашырыць уяўленне аб жанры "музычная казка". Упершыню філармонія запрасіла для пастаноўкі музычнага твора тэатральнага рэжысёра. Гэты праект з'яўляецца сумеснай працай віцебскага рэжысёра Антона Грышкевіча і салістаў філармоніі Аксаны Новікавай і Алены Граковай, вядучай Таццяны Савіцкай і канцэртмайстра Таццяны Шахрай. "Для калектыву філармоніі праца над музычнай казкай сумесна з тэатральным рэжысёрам стала цікавым эксперыментам. Антон прыўнёс у пастаноўку новую для нас стылістыку", - адзначыла Нелі Мацаберыдзэ. Прэм'ера музычнай казкі "Ласкуцік і воблака" прызначана на 20 сакавіка. Наступным падарункам для юных слухачоў стане прэм'ера музычнай праграмы "Герой дзіцячых кніг", якая па сутнасці ўяўляе сабой своеасаблівае музычнае падарожжа ў свет герояў любімых літаратурных твораў. Гэта яшчэ адна супольная праца тэатральнага рэжысёра Антона Грышкевіча з салісткай філармоніі Джуліетай Тарахчан і вядучай Таццянай Савіцкай. Пад заслонай канцэртнага сезона філармонія прадставіць інструментальную казку "Залаты ключык", створаную маладым салістам філармоніі, стыпендыятам спецыяльнага фонду Прэзідэнта Рэспублікі Беларусь па падтрымцы таленавітай моладзі Уладзіславам Серпінскім па матывах вядомага твора Аляксея Талстога. У гэтым канцэртным сезоне Віцебская філармонія значную ўвагу надае дзіцячай аўдыторыі. Артысты філармоніі падрыхтавалі чатыры новыя прадстаўленні для юных слухачоў. Падарожжы ў свет музыкі праходзяць у рамках дзіцячага абанемента "ФаСолька запрашае", які аб'ядноўвае яркія і маляўнічыя музычныя прадстаўленні калектыву філармоніі. "Ужо другі год запар мы прыцягваем дзіцячую аўдыторыю і імкнемся выхоўваць, прывіваць добры густ менавіта з выкарыстаннем спецыфічных музычных жанраў, напрыклад дзіцячы мюзікл або музычная казка, што не зусім характэрна для філарманічнай установы, але дае вынік і выклікае цікавасць у юнага слухача", - сказала Нелі Мацаберыдзэ.-0-