Ветэрана вайны Аркадзя Гаўрыльчыка сёння ўшаноўваюць з 100-годдзем глыбокаўцы
Ветэрана Вялікай Айчыннай вайны Аркадзя Гаўрыльчыка ўшаноўваюць сёння са 100-годдзем глыбачане, паведаміў карэспандэнту БЕЛТА старшыня Глыбоцкага раённага аб'яднання грамадскага аб'яднання ветэранаў Уладзімір Развадоўскі.
У святочным мерапрыемстве прымуць удзел старшыня Глыбоцкага райвыканкама Алег Мархат, прадстаўнікі мясцовых органаў улады, грамадскіх аб'яднанняў, моладзевых арганізацый, а таксама жыхары Глыбокага. Ва ўрачыстай абстаноўцы ветэрану будуць уручаны ганаровая грамата, памятны медаль у гонар Дня беларускага пісьменства, а таксама новы пашпарт. "Усё гэта будзе суправаджацца шматлікімі віншаваннямі на адрас віноўніка ўрачыстасці, галоўнае з якіх, вядома ж, пажаданні здароўя і даўгалецця", - адзначыў Уладзімір Развадоўскі.
Нягледзячы на салідны ўзрост, глыбоцкі юбіляр і сёння дастаткова моцны. "Галоўным сакрэтам захавання сіл, на яго думку, з'яўляюцца філасофскае ўспрыманне жыцця і рэгулярныя фізічныя нагрузкі", - распавёў старшыня ветэранскай арганізацыі. Так, пасля вайны Аркадзь Іпалітавіч, які служыў у стралковай дывізіі, доўгі час працаваў у мясцовым калгасе, а пасля выхаду на пенсію трымаць сябе ў тонусе яму дапамагала праца егера.
У цяперашні час у Глыбоцкім раёне пражываюць 95 ветэранаў вайны, самаму маладому з якіх 88 гадоў. У 2013 годзе 28 чалавек з іх адсвяткуюць дзень нараджэння ад 90 да 100 гадоў. Усяго, па апошніх дадзеных, у Віцебскай вобласці пражываюць 4,5 тыс. ветэранаў Вялікай Айчыннай вайны (ветэранаў усіх катэгорый - больш за 283 тыс. чалавек).