Ветэраны Беларусі, Расіі і Латвіі сустрэліся на «Кургане Дружбы»

Моладзевы лагер "Бе-Lа-Русь" у 2019 годзе пачнецца ў адзін дзень з мерапрыемствамі на Кургане Дружбы. Пра гэта паведаміў сёння на сустрэчы ветэранаў ля гэтага памятнага месца старшыня Віцебскага аблвыканкама Мікалай Шарстнёў.

"Мы прынялі рашэнне ў наступным годзе адначасова з памятнымі мерапрыемствамі на Кургане дружбы правесці і моладзевы лагер "Бе-Lа-Русь". Яны яго праводзяць кожны год, але звычайна ў канцы ліпеня. Але нам важна, каб вы, ветэраны, якія памятаеце жахі вайны, расказалі моладзі наўпрост усю праўду пра тыя падзеі. Як тады аддавалі сябе да канца, пралівалі кроў, каб здабыць мірнае неба. Перамога далася вялікай цаной, і памяць пра яе трэба захоўваць вечна", - адзначыў Мікалай Шарстнёў.

Паводле яго слоў, з кожным годам значнасць мерапрыемстваў на мяжы трох краін не памяншаецца, хоць, на жаль, ветэранаў у страі ўжо няшмат. Удзельнікі сустрэчы 59 гадоў запар адчуваюць непадкупныя пачуцці і эмоцыі. Сюды прыязджалі папярэднія пакаленні, сёння гэта робіць новая генерацыя.

"Гэта нас усіх аб'ядноўвае, робіць больш моцнымі і ўпэўненымі ў заўтрашнім дні. Моладзь падтрымлівае ідэю старэйшых, з кожным годам маладых людзей усё больш на 9 мая, ушанаваннях ветэранаў, памятных датах. Цяпер наша задача перадаць ім традыцыі продкаў, каб Беларусь, Расія і Латвія вечна жылі мірна і па-суседску", - падкрэсліў кіраўнік Віцебскай вобласці.

Ён таксама падзякаваў ветэранам за тое, што стрымалі сваё леташняе абяцанне і прыехалі сёння на Курган Дружбы.

Салідарныя з гэтымі словамі ў сваіх выступленнях былі і часова выконваючы абавязкі губернатара Пскоўскай вобласці Міхаіл Ведзярнікаў і дэпутат Сейма Латвіі Артур Рубікс.

"Больш за паўвека таму скончылася вайна. З'явіліся новыя дзяржавы, праведзены межы, але гісторыя Вялікай Айчыннай вайны і Вялікай Перамогі ў нас агульная. І галоўная задача нязменная - захаванне дружалюбных адносін паміж нашымі народамі дзеля памяці продкаў і будучыні нашых дзяцей. Трэці год з намі тут знаходзіцца моладзь і гэта правільна, бо менавіта ім несці праўду пра вайну і перадаваць яе будучым пакаленням", - дадаў Міхаіл Ведзярнікаў. Ён у сваю чаргу ад імя жыхароў Пскоўскай вобласці павіншаваў беларусаў з надыходзячым Днём Незалежнасці.

На Кургане Дружбы прысутнічаў і памочнік Прэзідэнта - інспектар па Віцебскай вобласці Аляксандр Субоцін, які прыехаў сюды ўпершыню. "Гэта паказальна, што праз столькі гадоў традыцыя працягваецца, нягледзячы на перашкоды і забароны. Хоць надвор'е сёння і не радуе, але столькі людзей, усмешак і станоўчых эмоцый даказваюць, што Кургану Дружбы быць", - рэзюмаваў Аляксандр Субоцін.

Сёння на стыку трох дзяржаў праходзіць 59-я міжнародная сустрэча франтавікоў, партызан і падпольшчыкаў Беларусі, Расіі, Латвіі на Кургане Дружбы. Прымаючым бокам у гэтым годзе стала Беларусь. Сустрэча пачалася з ускладання кветак і вянкоў - спачатку да манумента героям-камсамольцам вёскі Прошкі на беларускай зямлі, затым - да помніка камсамолцы-разведчыцы Марыі Пынто на тэрыторыі Расіі. І ў завяршэнне кіраўніцтва Пскоўскай і Віцебскай абласцей перадалі кошык з кветкамі латвійскаму боку для ўскладання

да манумента Герою Савецкага Саюза Іманту Судмалісу. Да пачатку памятных мерапрыемстваў яго ўдзельнікі, падзеленыя невялікай рэчкай Сіняй, па якой праходзіць лінія мяжы паміж Расіяй і Латвіяй, махалі адзін аднаму, перадавалі прывітанне, жадалі здароўя і поспехаў у пачынаннях, некалькі разоў заводзячы хорам "Кацюшу".

Курган Дружбы быў насы́паны ў 1959 годзе на мяжы трох рэспублік - БССР, РСФСР і Латвійскай ССР у гонар баявога супрацоўніцтва партызан Беларусі, Расіі і Латвіі. Зямля для яго ўзята з магіл партызан і воінаў Чырвонай арміі, з месцаў гібелі Аляксандра Матросава, Клаўдзіі Назаравай, Леаніда Голікава, Марыі Парыва́евай і іншых герояў. Да кургана пракладзены тры алеі: з Беларусі - бярозавая, з Расіі - кляновая, з Латвіі - ліпавая. На вяршыні Кургана расце дуб - сімвал непарушнай дружбы трох народаў. На трох гранітных плітах на трох мовах напісана: "Курган Дружбы узведзены на стыку межаў трох братніх рэспублік у гонар баявой дружбы, скрэпленай крывёй у гады Вялікай Айчыннай вайны рускіх, беларускіх і латышскіх партызан. Адкрыты 3 ліпеня 1959 года".

БЕЛТА. Выкарыстана фота БЕЛТА і сайта http://www.pskov.ru