ВГТУ у верасні набярэ беспрацоўных і прадпрымальнікаў для навучання бізнес-адміністраванню

Віцебскі дзяржаўны тэхналагічны ўніверсітэт у верасні бягучага года пачне набор прадпрымальнікаў і беспрацоўных для ўдзелу ў рэалізацыі праекта па навучанні бізнес-адміністраванню, паведаміла карэспандэнту БЕЛТА загадчыца кафедры эканамічнай тэорыі і маркетынгу ВДТУ Галіна Яшава.

Праект "Новыя тэхналогіі і інструменты навучання бізнес-адміністраванню суб'ектаў малога і сярэдняга бізнесу Віцебскага рэгіёна" фінансуецца за кошт гранта інфармацыйна-асветніцкай установы "Новая Еўразія" са сродкаў Агенцтва ЗША па міжнародным развіцці USAID. У верасні на факультэце павышэння кваліфікацыі і перападрыхтоўкі кадраў ВДТУ адбудзецца набор дзвюх мэтавых груп навучання: беспрацоўнага насельніцтва і прадпрымальнікаў малога і сярэдняга бізнесу.

Як патлумачыла Галіна Яшава, навучанне ўжо дзейных прадпрымальнікаў будзе ажыццяўляцца ўпершыню. Рэалізацыя праекта пачалася з вывучэння патрэб бізнесу шляхам правядзення анкетавання, на аснове якога пазней была складзена навучальная праграма курсаў.

Між тым у чэрвені бягучага года адбыўся выпуск першай мэтавай групы - 12 слухачоў з ліку беспрацоўных Віцебска, якія навучаліся па праграме "Асновы прадпрымальніцкай дзейнасці". Яны вывучылі бізнес-планаванне, маркетынг, падаткаабкладанне, бухгалтарскі ўлік, гаспадарчае права і іншыя дысцыпліны. І паралельна працавалі над тэхніка-эканамічным абгрунтаваннем свайго бізнесу. "У іх быў добры стымул - атрымаць дзяржаўную субсідыю на развіццё свайго бізнесу. Яна склала ў другім квартале звыш Br16,2 млн", - адзначыла Галіна Яшава, якая таксама выступае кіраўніком праекта.

За перыяд навучання цягам месяца слухачы прадставілі эканамічнае абгрунтаванне сваіх бізнес-праектаў па стварэнні цырульні, салона прыгажосці, аўтамайстэрні, крамы будматэрыялаў, швейнага атэлье і іншых. Затым выпускнікі абаранялі свае бізнес-планы ў ВНУ і ўпраўленні па працы, занятасці і сацыяльнай абароне Віцебскага гарвыканкама. Усе яны атрымалі субсідыі, і ўжо пачалі з'яўляцца першыя вынікі. "Найбольш актыўная ў групе, стараста Варвара Аляксандрава, першай абараніла бізнес-план і атрымала субсідыю. 27 ліпеня адбылося адкрыццё яе салона прыгажосці па пр. Фрунзе. Гэта даказвае запатрабаванасць такой формы навучання і падтрымкі малога бізнесу з боку дзяржавы", - падкрэсліла Галіна Яшава.

Кацярына Князева