Віктар Гутара став новым старшынёй Шумілінскага райвыканкама
Для Віктара Гутарава Шумілінскі раён родны. Сюды пераехалі яго бацькі, калі ён быў яшчэ дзіцем, тут хадзіў у школу, тут пачыналася яго працоўная біяграфія. У 1981 годзе, пасля заканчэння Беларускай сельгасакадэміі, стаў працаваць аграномам у калгасе імя Леніна. Затым – дырэктарам саўгаса «Казяны», займаў адказныя пасады ў партыйных органах, Шумілінскім райвыканкаме, узначальваў ТАА «Вежа». Ён мае досвед працы кіраўніка раённай вертыкалі – восем гадоў быў старшынёй Пастаўскага райвыканкама. Апошнія два гады праявіў сябе на грамадскай ніве, з'яўляючыся старшынёй абласной арганізацыі Беларускага прафсаюза работнікаў аграпрамысловага комплексу.
– Па настроі людзей зразумела, што зроблены правільны выбар кіраўніка раёна. Калі чалавек, назапасіўшы жыццёвы досвед, вяртаецца ў родныя мясціны, ён абавязкова пастараецца зрабіць усё, каб навесці парадак на зямлі, стварыць добрыя ўмовы для людзей, – падкрэсліў старшыня аблвыканкама Мікалай Шэрстнёў, які прыняў удзел у сесіі.
А працаваць для гэтага давядзецца, засучыўшы рукавы. Па многіх паказчыках Шумілінскі раён не на добрым рахунку. У прыватнасці, выручка ад рэалізацыі прадукцыі аграпрамысловага комплексу ў разрэзе іншых сфер складае толькі 40%. (Да прыкладу, у Віцебскім раёне – 70%). Гэта не значыць, як адзначыў Мікалай Шэрстнёў, што іншыя галіны, будаўніцтва і прамысловасць, добра працуюць, проста сельгасвытворчасць правалена. Больш чым напалову раён датаваны. І гэта становішча трэба выпраўляць. У 2021 годзе ў Шуміліне пройдуць «Дажынкі». З якімі паказчыкамі сустрэне раён свята працаўнікоў вёскі? Гэта пытанне сёння стаіць даволі востра.
– Я ведаю стыль працы Віктара Гутарава. Упэўнены, што ён у камандзе аднадумцаў справіцца з пастаўленымі перад рэгіёнам задачамі, – сказаў кіраўнік вобласці.
Са свайго боку новы кіраўнік раёна запэўніў, што гатовы да нялёгкай працы, адзначыўшы пры гэтым, што яго жыццёвы прынцып – менш размаўляць, пасяджэнні, а больш працаваць, часцей бываць на месцах.
– Я чалавек каманды. Без аднадумцаў немагчыма справіцца з любой справай. Таму спадзяюся на падтрымку ўсіх кіраўнікоў, дэпутатаў, разуменне людзей. Мы павінны вырабляць больш прадукцыі для таго, каб плаціць зарплату. Лічу, што ўсе формы ўласнасці добрыя. Таму будзем падтрымліваць тых, хто адкрывае і пачынае свой бізнес. Я сам некалькі гадоў працаваў на прыватным прадпрыемстве, упэўнены, што гэта таксама дзяржаўная справа, – адзначыў Віктар Гутараў.
Новы кіраўнік раёна таксама падкрэсліў, што неабходна не чакаць дапамогі з боку, а самім узяцца за працу, тады і яе вынікі будуць прыносіць матэрыяльнае і маральнае задавальненне.