Віртуальны музей, японская сустрэча і прэм'еры. «Лялька» адкрывае сезон

Спектакль пра незвычайную вясёлую дзяўчынку, якая есць цвікі і п'е школьныя чарнілы, з'явіўся ў вераснёўскай афішы Беларускага тэатра «Лялька». Якія яшчэ прэм'еры падрыхтавалі віцебскія лялечнікі? Пра гэта напярэдадні адкрыцця тэатральнага сезона распавёў мастацкі кіраўнік калектыву, заслужаны дзеяч мастацтваў Беларусі Віктар Клімчук.

Новы тэатральны год стартуе ў нядзелю, 24 верасня. У гэты дзень «Лялька» прызначае сустрэчу як сваім юным, так і дарослым гледачам. Дзяцей чакае інтэрактыўны спектакль «Вясёлы Дарафей», а ўвечары будзе паказаны «Дэкамерон», пастаўлены па адной з самых знакамітых кніг ранняга італьянскага Адраджэння Джавані Бокача. Перад пачаткам спектакля можна будзе патанцаваць – для жадаючых майстар-клас дасць калектыў «Стылягі-хоп».

У канцы месяца малышы пазнаёмяцца з Фенькай з аднайменнага твора Леаніда Панцялеева, аўтара «Рэспублікі ШКИД». Над спектаклем працаваў малады рэжысёр Міхаіл Клімчук. Яшчэ адна новая пастаноўка пад назвай «Мой Надзейны Сябра: 101» – сумесны праект з МНС.

Тэатр узяў у рэпертуарны партфель п'есу беларускага драматурга Андрэя Курэйчыка «Дзiцячы сад». Віктар Клімчук таксама падзяліўся задумкамі паставіць спектакль па кнізе Марка Шагала «Маё жыццё». Для сумеснай працы ён запрасіў тэатральную мастачку з Мурманска Сафію Шахноўскую, дэкарацыі і лялькі якой яго ўразілі.

Працягне «Лялька» традыцыю правядзення тэатральных вечароў. Першы – «Восеньская мiстэрыя: подых Сярэднявечча» – пройдзе ў канцы кастрычніка. У праграме – спектакль "Скрыпка дрыгвы й верасовых пустэчаў" па матывах твораў Уладзіміра Караткевіча і выступленне клуба гістарычнай рэканструкцыі "Нагльфар". У сярэдзіне лютага запланавана сустрэча ў японскім стылі, а 1 красавіка – вечар гумару.

Віцебскія лялечнікі атрымалі запрашэнне на міжнародныя фестывалі ў Кіеў, Тамбоў, Белгарад і Мінск. Летась яны прывезлі Гран-пры з Казані за спектакль «Загубленая душа, або Пакаранне грэшнiка». Сёлета яшчэ адна тытулаваная пастаноўка «Брэменскiя музыкi» адзначыць 20-годдзе.

Да новага сезона тэатр абнавіў светлавое і гукавое абсталяванне. Як растлумачыў дырэктар «Лялькі» Аляксандр Рыгораў, аблвыканкам выдзеліў 100 тыс. рублёў на ўмацаванне матэрыяльна-тэхнічнай базы. А на сайце тэатра неўзабаве з'явіцца віртуальны музей, дзе размесцяць інфармацыю аб старых спектаклях, якія ўвайшлі ў гісторыю «Лялькі». Будзе створана і мабільная версія сайта.

Але з тэатрам лепш сустракацца не ў віртуальнай, а ў рэальным жыцці. Цэны на білеты засталіся ранейшымі – ад 3,5 да 5 рублёў.

Таццяна Пастэрнак. Фота з архіва «Віцебскіх вестак».