Віцебшчына лідзіруе на нарыхтоўцы кармоў, апярэджваючы іншыя вобласці

Учора ў Верхнядзвінскім раёне прайшла выязная калегія аблсельгаспрода. Мы папрасілі намесніка старшыні камітэта па сельскай гаспадарцы і харчаванні аблвыканкама Івана Фёдарава расказаць, што значыцца першым пунктам у парадку дня ў аграрыяў.

– На калегіі, якая прайшла пры ўдзеле першага намесніка міністра сельскай гаспадаркі і харчавання Беларусі Леаніда Адамавіча Марыніча і намеснік старшыні аблвыканкама Віктара Вітальевіча Аскеркі, падведзены вынікі карманарыхтоўкі, разгледжаны пытанні гатоўнасці і пастаўлены задачы па ўборцы збожжавых і сяўбе азімых. У практычнай частцы Верхнядзвінскі райаграсэрвіс падзяліўся досведам стварэння міжгаспадарчых атрадаў і арганізацыі рамонту энергонасычаных трактароў. У ААТ «Шайцерава» паказалі лінейку гатоўнасці тэхнікі, сушыльнага, вагавога і складскога гаспадарак. Асаблівая ўвага была ўдзелена рэгуляванню камбайнаў.

У цэлым па вобласці карманарыхтоўка ідзе на добрым узроўні. Сёння на ўмоўную галаву жывёлы прыпадае 14,3 цэнтнера кармавых адзінак (амаль на 2 ц. адз. больш леташняга), што з'яўляецца самым высокім паказчыкам у краіне. Надвор'е дазваляе атрымаць паўнавартасныя другія ўкосы. У гэтым годзе мы пасеялі 60 тыс. га адналетніх траў (у мінулым – 12 тыс. га). Нядрэнныя віды на кукурузу, якая займае 74 тыс. га. Так што да стойлавага перыяду мы падыдзем з паўнавартаснай кармавой базай.

– Вы ўжо згадалі міжгаспадарчыя атрады, якія ў гэтым годзе ўпершыню ўдзельнічалі ў карманарыхтоўцы. Які ўнёсак яны зрабілі ва ўборку траў?

– Міжгаспадарчыя атрады дазволілі сельгаспрадпрыемствам са слабай тэхнічнай базай нарыхтаваць кормы першага ўкосу. На іх прыпадае 500 тыс. т сенажу, або 25% ад агульнай колькасці. Такія звяны будуць працягваць працаваць. Досвед міжгаспадарчых атрадаў выкарыстоўваем і ў збожжаўборачнай кампаніі. Яны ствараюцца на базе Дубровенскага, Віцебскага, Верхня-дзвінскага райаграсэрвісаў, Заходне-Дзвінскага МРС, Віцебскага МЭЗа. Камбайны будуцьнакіроўвацца ў дапамогу ў тыя раёны і гаспадаркі, дзе высокая нагрузка на адзінку тэхнікі.

Усяго трэба ўбраць 354 тыс. га збожжавых і зернабабовых, 58 тыс. га рапсу. На першую дэкаду жніва ёсць 10 тыс. тон паліва. Вядуцца перамовы з «Белнафтахімам» аб пастаўцы 15 тыс. тон з растэрміноўкай плацяжу пад гарантыю паставак збожжа або іншай прадукцыі.

– Ці будуць гараджане дапамагаць вяскоўцам?

– На перыяд жніва прадпрыемствы і арганізацыі з гарадоў і райцэнтраў камандзіруюць у дапамогу аграрным сектару каля тысячы механізатараў і кіроўцаў. Усяго ў агульным уборачным працэсе будзе задзейнічана больш за 7 тыс. чалавек.

Сяргей Ляшук, «Віцебскія весці».