Віцебск і Гомель могуць увайсці ў Глабальную сетку навучальных гарадоў ЮНЕСКА
Мерапрыемства з'яўляецца часткай праграмы Тыдняў Германіі-2017 і Тыдняў устойлівага развіцця, арганізуемых Праграмай падтрымкі Беларусі Федэральнага ўрада Германіі ў супрацоўніцтве з дзяржаўнымі, міжнароднымі і грамадскімі арганізацыямі. У канферэнцыі прымуць удзел прадстаўнікі профільных міністэрстваў, органаў улады Віцебска і Гомеля, бізнесу, дзяржаўных і камерцыйных устаноў адукацыі, міжнародных агенцтваў і грамадскіх арганізацый. Будуць прадстаўлены даклады беларускіх экспертаў аб месцы эканомікі ведаў у развіцці беларускага прадпрымальніцтва, ролі бізнес-адукацыі ў фарміраванні крэатыўнай эканомікі рэгіёнаў, а таксама абласных стратэгіях устойлівага развіцця. Замежныя эксперты - каардынатар Глабальнай сеткі навучальных гарадоў ЮНЕСКА Сунг Лі, прадстаўнік Народнага ўніверсітэта горада Гельзенкірхен Алена Альбертоўская і спецыяліст аддзела па навуцы і эканоміцы адміністрацыі горада Рэгэнсбург Себасцьян Кнопп - раскажуць аб вопыце ўкаранення канцэпцыі "навучальны горад" і развіцці крэатыўнай эканомікі на мясцовым узроўні. Дыскусійная частка будзе прысвечана абмеркаванню перспектыў уступлення Віцебска і Гомеля ў Глабальную сетку навучальных гарадоў ЮНЕСКА.
Госцем сустрэчы стане і дэпутат Палаты прадстаўнікоў Нацыянальнага сходу Беларусі Таццяна Старынская, якая ў 2012 годзе рэалізавала разам з партнёрамі ў Віцебску праект "Навучальны рэгіён: адукацыя для ўсіх пакаленняў". Яго вынікам стала стварэнне на базе Тэрытарыяльнага цэнтра сацыяльнага абслугоўвання насельніцтва Першамайскага раёна Народнага сацыяльнага ўніверсітэта. "Запатрабаванасць адукацыйных паслуг, якія прадастаўляюцца сацыяльным універсітэтам на працягу некалькіх гадоў,паказала, што менавіта адукацыя задавальняе асобасныя і прафесійныя патрэбы чалавека, а значыць, уносіць уклад у развіццё чалавечага капіталу, забяспечвае жыццяздольнасць асобных супольнасцей і ўстойлівае сацыяльна-эканамічнае развіццё рэгіёнаў\", - упэўнена Таццяна Старынская. Міжнародная канферэнцыя \"Навучальны горад для крэатыўнай эканомікі\" з'яўляецца часткай аднайменнай праграмы, якая рэалізуецца Прадстаўніцтвам Нямецкай асацыяцыі народных універсітэтаў у Рэспубліцы Беларусь у супрацоўніцтве з Асацыяцыяй дадатковай адукацыі і асветы, Асацыяцыяй бізнес-адукацыі і Асветніцкай установай \"Сацыяльныя інтэрвенцыі\".
Праграма праводзіцца ў 2017-2018 гадах у двух пілотных гарадах - Віцебску і Гомелі. Яна накіравана на садзейнічанне рэалізацыі абласных стратэгій устойлівага развіцця на 2016-2025 гады пры дапамозе развіцця міжсектаральнага супрацоўніцтва, а таксама прасоўвання ідэй крэатыўнай эканомікі і канцэпцыі \"навучальны горад\" сярод прадстаўнікоў мясцовай улады, устаноў адукацыі, бізнесу і грамадзянскай супольнасці.