Віцебск і італьянская Брэшыя плануюць развіваць супрацоўніцтва ў эканамічнай і сацыяльнай сферах

20 кастрычніка, Віцебск /Сяргей Кочатаў - БЕЛТА/. Віцебск і італьянскі горад Брэшыя плануюць развіваць супрацоўніцтва ў гандлёва-эканамічнай і сацыяльна-культурнай сферах. Папярэдняя дамоўленасць аб гэтым дасягнута падчас візіту дэлегацыі Віцебскай вобласці ў аднайменную італьянскую правінцыю з 11 па 15 кастрычніка, паведамілі карэспандэнту БЕЛТА ў Віцебскім аддзяленні Беларускай гандлёва-прамысловай палаты. На перамовах кіраўніцтва аблвыканкама і прэфектуры італьянскага горада, якія адбыліся, было адзначана, што Віцебск і Брэшыя маюць значны патэнцыял для ўзаемадзеяння ў культурнай і сацыяльнай сферах, развіцця турыстычных кантактаў, кааперацыйных сувязей паміж прадпрыемствамі. Гэта стварае цікавую і ўзаемавыгадную аснову перспектыўнага супрацоўніцтва, імпульсам для якога можа стаць падпісанне адпаведнага пагаднення паміж гарадамі. Прадстаўнікі аблвыканкама і прэфектуры дамовіліся прапрацаваць гэтае пытанне і выйсці на падпісанне дакумента ўжо ў першым паўгоддзі 2011 года падчас планаванага адказнага візіту італьянскай дэлегацыі ў Віцебск. Асноўнай тэмай візіту беларускай дэлегацыі стала прэзентацыя эканамічных магчымасцей Віцебска і Віцебскай вобласці, а таксама абмеркаванне перспектыўных напрамкаў узаемадзеяння як паміж прадпрыемствамі, так і гарадамі і раёнамі беларускага і італьянскага рэгіёнаў. У склад дэлегацыі ўвайшлі кіраўнікі вобласці і прадпрыемстваў, зацікаўленых у развіцці дзелавых кантактаў з італьянскімі прадпрыемствамі па розных напрамках. Падчас паездкі былі арганізаваны сустрэчы з кіраўнікамі прэфектуры і правінцыі, а таксама прадстаўнікамі рэгіёна Ламбардыя, у які адміністрацыйна ўваходзіць правінцыя Брэшыя. Дзелавая частка праграмы візіту ўключала правядзенне бізнес-сустрэч віцебскіх і італьянскіх прадпрыемстваў у гандлёва-прамысловых палатах гарадоў Мантуя і Брэшыя. Па выніках перамоваў было падпісана пагадненне аб супрацоўніцтве паміж Віцебскім аддзяленнем БелГПП і Асацыяцыяй гандлёва-прамысловых палат краін Цэнтральнай Еўропы (ACCOA), якое будзе спрыяць фарміраванню спрыяльнага асяроддзя для пошуку дзелавых партнёраў, устанаўлення кантактаў паміж беларускімі і італьянскімі прадпрыемствамі, а таксама пашырэнню эканамічнай кааперацыі рэгіёнаў дзвюх краін. Акрамя таго, дасягнуты папярэднія дамоўленасці аб узаемадзеянні ў турыстычнай сферы. Таксама віцебская дэлегацыя праявіла цікавасць да ўкаранення італьянскіх тэхналогій у камунальную інфраструктуру гарадоў Віцебскай вобласці, а таксама для перапрацоўкі пабочных прадуктаў вытворчасці ў энергетычныя рэсурсы. Кіраўнікі прадпрыемстваў азнаёміліся з магчымасцямі ўзаемадзеяння з італьянскімі партнёрамі пры мадэрнізацыі і тэхнічным пераўзбраенні вытворчых комплексаў. Арганізатарамі візіту выступілі аблвыканкам, Віцебскае аддзяленне БелГПП і Асацыяцыя гандлёва-прамысловых палат Цэнтральнай Еўропы (ACCOA). Правінцыя Брэшыя размешчана ў паўночнай частцы Італіі, яе плошча складае больш за 4,7 тыс. кв. км, насельніцтва - звыш 1,1 млн. чалавек. Асноўнымі відамі дзейнасці з'яўляюцца сельскагаспадарчая вытворчасць (аліўкі і аліўкавы алей, віно), вытворчасць транспартных сродкаў, пад'ёмна-транспартнага абсталявання, у правінцыі развіты металургічная і тэкстыльная прамысловасць, энергетыка, выпуск будаўнічых матэрыялаў, зброевая вытворчасць.-0-