Віцебск дазволіць фестывалю "Факел" разгарэцца яшчэ ярчэй
Віцебск дазволіць фестывалю "Факел" разгарэцца яшчэ ярчэй, заявіў на сустрэчы з журналістамі народны артыст Расіі, лаўрэат Дзяржаўнай прэміі Расійскай Федэрацыі старшыня журы карпаратыўнага фестывалю ААТ "Газпрам" "Факел" Святаслаў Бэлза, перадае карэспандэнт БЕЛТА.
"Я вельмі рады, што фестываль "Факел" прыйшоў у Віцебск, у Беларусь. Гэта дазволіць яму разгарэцца яшчэ ярчэй", - такое меркаванне выказаў Святаслаў Бэлза з нагоды правядзення ўпершыню ў Беларусі фіналу V карпаратыўнага фестывалю самадзейных творчых калектываў і выканаўцаў даччыных таварыстваў і арганізацый ААТ "Газпрам". Каля 3 тыс. гасцей форуму, у тым ліку 1,3 тыс. удзельнікаў, прымае ў гэтыя дні Віцебск - горад, які сваімі шматлікімі фестывалямі, цікавымі культурнымі праектамі заслужыў званне культурнай сталіцы краіны.
Па словах Святаслава Бэлзы, фестываль "Газпрама" набыў сёння міжнароднае гучанне не толькі за кошт прыходу ў Беларусь. "Сярод яго ўдзельнікаў прадстаўнікі Кітая, Славеніі, Аўстрыі. Акрамя таго, лаўрэаты форуму выступалі з гастрольнымі паездкамі ў Кітаі і іншых краінах", - растлумачыў артыст.
Касаючыся судзейскай працы на фестывалі, старшыня журы адзначыў, што яе складанасць звязана ў першую чаргу з высокім майстэрствам конкурсантаў. "Кожны раз я прыходжу ў збянтэжанасць ад таго, наколькі высокі ўзровень калектываў "Газпрама". І часта даводзіцца нават нагадваць членам журы, што перад намі менавіта самадзейныя, а не прафесійныя артысты", - прызнаўся Святаслаў Бэлза. З асаблівай стараннасцю судзейская калегія падыходзіць да ацэнкі выступленняў дзіцячых калектываў, кіруючыся перш за ўсё добразычлівай патрабавальнасцю і патрабавальнай добразычлівасцю. "Судзіць іх сапраўды складана, бо ўсе дзеці неверагодна таленавітыя. І важна захаваць гэтую таленавітасць у далейшым, ужо ў дарослым узросце. Таму стараемся ўлічваць усё, у тым ліку судзіць, што называецца, "на вырост", каб прынесці дзецям як мага менш засмучэнняў", - адзначыў артыст.
Карпаратыўны фестываль "Газпрома" "Факел" праводзіцца адзін раз на два гады ўжо на працягу дзесяці гадоў у рэгіёнах, дзе ёсць структурныя падраздзяленні кампаніі. З 13 па 19 мая ў Віцебску праходзіць заключны тур V карпаратыўнага фестывалю.