Віцебск стаў першым беларускім горадам, які далучыўся да Глабальнай сеткі навучальных гарадоў ЮНЕСКА

Каб горад квітнеў, удасканальваўся і станавіўся лепшым, яго жыхарам пастаянна трэба асвойваць новыя прафесіі і атрымліваць новыя веды. Глабальная сетка гарадоў, якія навучаюцца, ЮНЕСКА была створана, каб заахвочваць развіццё населеных пунктаў, укараняючы практыку навучання на працягу ўсяго жыцця. У такім горадзе вучацца ўсе і ўсюды, а значыць, прыкладаюцца максімальныя намаганні па садзейнічанні, у тым ліку, інклюзіўнаму навучанню, адраджаюцца традыцыі навучання ў сем'ях — і ўсё гэта з выкарыстаннем сучасных тэхналогій. Па сутнасці, горад, які навучаецца, выводзіць адукацыю за межы класічных ВНУ, стварае новыя магчымасці для кар'ернага росту і пераменаў у сектары занятасці, а таксама дапамагае развіць патэнцыял жыхароў горада.

Цяпер праект аб'ядноўвае больш за тысячу гарадоў па ўсім свеце, якія ўжо сталі альбо плануюць стаць гарадамі, што навучаюцца, але беларускі горад да Глабальнай сеткі падключыўся ўпершыню. Адпаведны сертыфікат старшыні Віцебскага гарвыканкама Віктару Мікалайкіну уручылі сёння ў Міністэрстве замежных спраў. З прывітальным словам да ўдзельнікаў цырымоніі звярнуўся намеснік міністра замежных спраў Алег Краўчанка.

Нагадаем, некалькі гадоў таму менавіта Віцебская вобласць (нароўні з Мінскай) стала першай, дзе прэзентавалі пілотны праект «Горад, які навучаецца: адукацыя для ўсіх пакаленняў». Праект знаёміў гараджан з канцэпцыяй «горад, які навучаецца/рэгіён, які навучаецца» і распавядаў пра практыкі па арганізацыі навучання на працягу ўсяго жыцця.

Сярод краін — суседзяў Беларусі гарады, якія навучаюцца, ёсць у Латвіі, Літве, Расіі і Украіне. Яны ўдзельнічаюць у міжнародным дыялогу па пытаннях палітыкі, экалогіі, эксперыментальных даследаванняў, вырашаюць праблемы сацыяльнай інклюзіі і будуюць эканоміку, заснаваную на новых ведах.

Плануецца, што ў далейшым да Глабальнай сеткі гарадоў, якія навучаюцца, ЮНЕСКА далучацца і іншыя гарады нашай краіны.

"СБ".