Віцебск выходзіць у вышэйшую лігу станкабудавання. Завод «СТР» будзе выпускаць унікальныя для Беларусі металаапрацоўчыя цэнтры

Выпуск унікальных для Беларусі вялікіх металаапрацоўчых цэнтраў партальнага тыпу плануе асвоіць віцебскае ТАА «Завод «СТР». Стварэнне падобнага абсталявання – гэта вышэйшая ліга станкабудавання, яно вырабляецца выключна на заказ, а кошт аднаго цэнтра перавышае 1,5 млн еўра.

Па словах дырэктара прадпрыемства Вячаслава Крывашэя, навінкі будуць вырабляцца ў кааперацыі з нямецкімі партнёрамі групы кампаній «АХА», куды з 2010 года ўваходзіць віцебскі завод. Сёння для гэтага ўжо падрыхтаваны спецыялісты і вытворчая база, справа за маркетынгам і атрыманнем заказаў. На першапачатковым этапе спатрэбіцца падтрымка нямецкіх тэхнолагаў, але ў далейшым айчынныя станкабудаўнікі будуць працаваць самастойна, у тым ліку па сэрвісным абслугоўванні абсталявання.

Аб сур'ёзнасці перспектыўнай праграмы прадпрыемства сведчаць тэхнічныя характарыстыкі такіх цэнтраў. Гэта высокапрадукцыйныя металаапрацоўчыя станкі з прымяненнем 5-каардынатнай апрацоўкі, гэта значыць, якія дазваляюць працаваць з нарыхтоўкай з усіх бакоў і пад любымі вугламі. Плошча працоўнага стала складае 48 кв. м (4 м x 12 м), што дае магчымасць для апрацоўкі буйнога прамысловага матэрыялу, вялікіх корпусных дэталяў, напрыклад, станін пракатных станоў, якія выкарыстоўваюцца ў металургічнай вытворчасці. Цэнтр працуе пад кіраваннем аднаго спецыяліста, прычым станок можа суткі апрацоўваць дэталь без удзелу чалавека ў адпаведнасці з зададзенай праграмай. Тэрмін вырабу адзінкі абсталявання складае каля года. Зразумела, што гаворка ў гэтым выпадку не ідзе пра серыйную вытворчасць, а толькі пра выпуск на заказ канкрэтнага пакупніка.

Уключэнне такіх станкоў у вытворчы партфель для віцебскага прадпрыемства стала магчымым дзякуючы пашырэнню яго прысутнасці на расійскім рынку. Сёння завод «СТР» стварае сумесную вытворчасць у Чалябінскай вобласці, якая ўвойдзе ў утвораны там станкабудаўнічы кластар.

— Расійскія машынабудаўнікі праяўляюць зацікаўленасць у такіх мадэлях, таму мы разлічваем на атрыманне заказаў, — тлумачыць Вячаслаў Крывашэй.

Прадпрыемства, якое адзначыла сёлета 15-годдзе з дня ўтварэння, пачынала сваю дзейнасць з рамонту і мадэрнізацыі станкавога абсталявання, пазней у партфелі з'явіліся ўніверсальныя станкі для суднабудавання. Апошнія чатыры гады пасля ўваходжання ў групу кампаній «АХА» завод «СТР» надае асноўную ўвагу развіццю вытворчасці апрацоўваючых цэнтраў.

Сяргей Анто́наў, «Віцебскія весці».