Віцебская бібліятэка замежнай літаратуры атрымала пастаянную прапіску на новым месцы
На новых плошчах з камфортам размясціўся ўвесь кніжны фонд установы, які складае больш за 7,5 тыс. кніг. Абсталяваны камп'ютарныя месцы для працы з электроннымі рэсурсамі, дзіцячая творчая лабараторыя, кабінет для заняткаў удзельнікаў моўнага клуба (у бібліятэцы вывучаюцца англійская, японская і польская мовы). Агульны аб'ём сродкаў, накіраваны на рамонтныя работы, склаў Br130 тыс. Важны ўклад у матэрыяльна-тэхнічнае аснашчэнне ўстановы культуры ўнесла амбасада ЗША ў Беларусі, пры падтрымцы якой за амаль 15 гадоў супрацоўніцтва па розных грантах на гэтыя мэты было накіравана $67 тыс.
"Бібліятэка замежнай літаратуры ў Віцебску - вельмі маладая, але перспектыўная. Мы рады, што ў год свайго 20-годдзя яна стала больш утульнай і камфортнай для чытачоў", - адзначыла на святочнай цырымоніі адкрыцця дырэктар Цэнтралізаванай бібліятэчнай сістэмы Віцебска Алена Багаценка.
Наваселле ўстанова адзначае ў Тыдзень бібліятэк. Фінішнай кропкай акцыі ў Віцебску стане "Бібліяноч", якая адбудзецца 13 верасня ў бібліятэцы імя М.Горкага. "У гэты дзень нашы госці ўжо сёмы раз стануць удзельнікамі чароўнага, крэатыўнага і крыху містычнага вечара, насычанага разнастайнымі праектамі на любы густ і ўзрост. Гэта танцавальная і фітнес-пляцоўка, розныя квэсты, паэтычны "ЛитКофейник", аўтарскі праект Уладзіміра Булаўскага "Віцебск у міфах і легендах", выступленні Тэатра моды "Стыль", студыі эстраднай песні "Шанс", зборнай каманды КВЗ, запланаваны незвычайныя выставачныя праекты, цікавыя госці і мноства прыемных сюрпрызаў", - распавяла Алена Багаценка.