Віцебская ДАІ выпусціць памяткі для кіроўцаў пра хуткасны рэжым на мяжы з Расіяй

Каб асобы, якія парушаюць ПДР у суседніх дзяржавах, не сыходзілі ад адказнасці, а аўтааматары не траплялі ў непрыемныя сітуацыі з-за незнання заканадаўства, Дзяржаўтаінспекцыя Віцебскай вобласці мае намер узмацніць інфармацыйнае супрацоўніцтва з калегамі з прыгранічных расійскіх абласцей.

Гэтыя праблемы абмяркоўваліся ў Віцебску на нарадзе кіраўнікоў УУС Віцебскага аблвыканкама і прадстаўнікоў упраўленняў МУС па Пскоўскай і Смаленскай абласцях.

Міліцыянеры Віцебскай, Пскоўскай і Смаленскай абласцей супрацоўнічаюць на працягу многіх гадоў. За гэты час назапашаны багаты вопыт правядзення сумесных спецыяльных аперацый і прафілактычных мерапрыемстваў, у тым ліку датычных бяспекі на дарозе.

Расіян, якія парушаюць хуткасны рэжым у Беларусі, штрафуюць ужо даўно. Як правіла, нашы дзяржаўтаінспектары спыняюць парушальнікаў на мяжы. Там парушальнік обязуется заплаціць штраф перад тым, як пакіне тэрыторыю краіны. Прычым калі чалавек трапіў у поле зроку камер назірання 5 ці 10 разоў, столькі ж штрафаў ён і заплаціць.

І яшчэ адзін важны нюанс. Калі нейкім чынам кіроўца перасек мяжу не разлічыўшыся, яго абавяжуць зрабіць гэта падчас чарговага наведвання Беларусі. І тут ужо не важна, хто будзе знаходзіцца за рулём: гаспадар "праштрафікаванай" машыны ці яго знаёмы, які ўзяў аўтамабіль пакатацца. Аштрафуюць таго, хто ў момант спынення знаходзіцца за рулём.

Гэты механізм, па словах начальніка УУС Віцебскага аблвыканкама Ігара Яўсеева, у Беларусі адпрацаваны і дзейнічае эфектыўна:

— Падобныя правілы дзейнічаюць і ў Расіі. Аднак большасць нашых аўтааматараў мяркуюць, што калі пскоўскі або смаленскі супрацоўнік ДІБДР склаў пратакол аб парушэнні правілаў дарожнага руху, а кіроўцу ўдалося праехаць праз мяжу, не заплаціўшы штраф, то пра яго забудуць. Нічога падобнага! Расійскае заканадаўства ў гэтым дачыненні яшчэ больш жорсткае. Калі пры паўторным наведванні Расіі высветліцца, што на парушальніку вісіць нясплачаны штраф, нашага земляка могуць яшчэ і арыштаваць на 10 сутак.

На думку міліцыянтаў, каля 80 працэнтаў нашых аўтамабілістаў не ведаюць гэтых нюансаў. Таму на сустрэчы з калегамі са Смаленска і Пскова Ігар Яўсееў даручыў кіраўніцтву ўпраўлення ДАІ УУС Віцебскага аблвыканкама распрацаваць памяткі, у якіх усю гэту інфармацыю будзе выкладзена. Раздаваць памяткі кіроўцам будуць у памежных пунктах пропуску. Якія канкрэтна службы гэтым зоймуцца — яшчэ трэба будзе прадумаць.

Такая мера, на думку міліцыянтаў, будзе спрыяць таму, што беларускія аўтамабілісты будуць больш дысцыплінавана і ашчадна паводзіць сябе на дарогах памежных расійскіх абласцей.

Аналагічныя памяткі плануецца таксама скласці па таварах з Еўропы, якія трапляюць пад санкцыі ў Расіі.

Рашэнні па гэтых, а таксама іншых сферах узаемадзеяння ўвайшлі ў выніковы трохбаковы дакумент, складзены падчас нарады ў Віцебску.

Сяргей Галеснік, СБ Беларусь Сегодня