Віцебская гімназія №2 паказала найлепшы вынік у абласной алімпіядзе па замежных мовах
Як адзначыў начальнік упраўлення адукацыі аблвыканкама Дзмітрый Хома, сёлета ў прадметных алімпіядах удзельнічалі звыш 1000 навучэнцаў з усёй Віцебшчыны.
Што тычыцца «замежнікаў», то школьнікі паказалі свае веды па англійскай, нямецкай, французскай, іспанскай і кітайскай мовах. З 177 удзельнікаў абласнога этапу 77 атрымалі дыпломы рознай годнасці. Сярод пераможцаў – вучні школ і гімназій Віцебска, Полацка, Наваполацка, Оршы, Лепеля, Чашнікаў, Докшыц, Пастаў і Верхнядзвінска.
Рабятам трэба будзе адстойваць гонар вобласці і трымаць планку сваіх папярэднікаў: на працягу апошніх гадоў прыдзвінцы паказваюць лепшыя вынікі ў краіне. Падрыхтоўка да маючых адбыцца выпрабаванняў пачалася літаральна адразу ж пасля атрымання ўзнагарод.
– Поспехі школьнікаў у алімпіядным руху залежаць не толькі ад магчымасцей школ і ўзроўню падрыхтоўкі педагогаў, але і ад стараннасці саміх навучэнцаў, а таксама падтрымкі бацькоў, – адзначыў Дзмітрый Хома.
Што тычыцца ўладаў, то яны аказваюць садзейнічанне ва ўмацаванні матэрыяльна-тэхнічнай базы навучальных устаноў. Так, у мінулым годзе было абсталявана звыш паўсотні камп'ютарных класаў.
Найбольш узнагарод у абласной алімпіядзе па замежнай мове, як расказаў дырэктар гімназіі №2 Канстанцін Кісялёў, заваявалі яго падапечныя, атрымаўшы 17 дыпломаў: 8 па англійскай, 5 па іспанскай і 4 па кітайскай. На рэспубліканскія прадметныя алімпіяды выйшлі 25 навучэнцаў гімназіі, у тым ліку 8 – па замежнай мове.
Для поспеху ў навучанні падрыхтаваны першакласны педагагічны кадравы склад, умацавана матэрыяльная база, складзены арыгінальныя навучальныя праграмы. Замежная мова дапамагае не толькі тым, хто вырашыў звязаць сваё жыццё з лінгвістыкай, але і іншым навучэнцам.
Напрыклад, гімназіст Антон Жыльцоў стаў бронзавым прызёрам міжнароднай алімпіяды па геаграфіі, а сваю працу на прэстыжны конкурс хлопец пісаў па-англійску.
– Веданне замежных моў – адно з базавых у сучасным свеце, – сцвярджае Канстанцін Кісялёў. – Сённяшнія рэаліі такія, што чалавек проста абавязаны на высокім узроўні валодаць асноўнай міжнароднай мовай – англійскай, і на прыстойным узроўні – любой іншай. Выпускнікам нашай гімназіі гэта дапамагае быць паспяховымі ў жыцці.
Вучні 11-х класаў, якія заваявалі на абласной алімпіядзе дыпломы I ступені на цэнтралізаваным тэсціраванні аўтаматычна атрымліваюць 100 балаў па адпаведным прадмеце.