Віцебская і Смаленская вобласці заключылі пагадненне аб развіцці інавацыйнай дзейнасці ў сістэме сацыяльнай абароны
Міжнародную школу па арганізацыі інавацыйнай дзейнасці ў сістэме сацыяльнай абароны насельніцтва плануюць стварыць прадстаўнікі гэтай сферы Віцебшчыны і Смаленшчыны.
Такое рашэнне прынята падчас візіту дэлегацыі Віцебскай вобласці на Смаленшчыну. Дырэктары дамоў-інтэрнатаў псіханеўралагічнага профілю Віцебшчыны наведалі рэабілітацыйны цэнтр для дзяцей і падлеткаў з абмежаванымі магчымасцямі «Вішэнкі», дзе ўдзельнічалі ў метадычным злёце па рабоце з дзецьмі і дарослымі з ментальнымі парушэннямі.
– З дэпартаментам Смаленскай вобласці па сацыяльным развіцці дасягнута пагадненне аб фарміраванні праграмы супрацоўніцтва, у якую ўключаны мерапрыемствы як на тэрыторыі Віцебскай вобласці, так і ў суседзяў. Будзем праводзіць у міжнародным фармаце метадычныя аб'яднанні, форумы, канферэнцыі, круглыя столы. У інавацыйнай школе – вывучаць апрабаваныя новыя методыкі і тэхналогіі смалян і дзяліцца сваім вопытам, – расказала начальнік упраўлення сацыяльнай падтрымкі насельніцтва і стацыянарных устаноў камітэта па працы, занятасці і сацыяльнай абароне аблвыканкама Вера Астапенка.