Віцебская моладзь адзначыць Дзень бібліятэк адкрытымі дэбатамі на тэму літаратуры і мастацтва

Віцебская моладзь адзначыць Дзень бібліятэк 15 верасня правядзеннем абласных адкрытых дэбатаў "Літаратура. Мастацтва. Маладзёны", паведаміў выканаючы абавязкі першага сакратара абласнога камітэта БРСМ Дзмітрый Туранок.

Мерапрыемства стане часткай яшчэ адной важнай падзеі - урачыстай цырымоніі ўзнагароджання пераможцаў абласнога конкурсу "Чытаем пра вайну", прысвечанага 70-годдзю Перамогі. Каманды - удзельніцы дэбатаў у дыскусійнай форме абмяркуюць актуальныя праблемы культурнага развіцця, рэалізацыі творчых здольнасцей, ідэй і інавацый сярод равеснікаў. У ходзе палемікі на тэму "Маладзёны ў культуры" юнакі і дзяўчаты падзеляцца ўласным поглядам на тое, як рэалізаваць свой творчы патэнцыял, прасунуць ідэі, накіраваныя на развіццё сферы культуры Віцебскай вобласці.

Дэбаты пройдуць у тры этапы: праектная прэзентацыя, абмен пытаннямі і думкамі, віктарына. У фінале аўтарытэтныя эксперты прымуць рашэнне, якая з дзвюх каманд аказалася больш пераканаўчай. У якасці суддзяў выступяць Дзмітрый Туранок, дырэктар абласной бібліятэкі імя У.Леніна Таццяна Адамян, старшыня абласнога аддзялення ГА "Саюз пісьменнікаў Беларусі" Тамара Краснава-Гусачэнка.

Маладзёжны праект "Адкрытыя дэбаты "ВЫБІРАЙ.BY!" стартаваў 1 ліпеня. Яго мэта - аб'яднанне намаганняў юнакоў і дзяўчат на сацыяльна значную дзейнасць на карысць грамадства. Асноўная тэматыка дыскусійных пытанняў на адкрытых дэбатах заключаецца ў самой назве праекта - выбар лепшага для Беларусі. Праект рэалізуецца ў некалькі этапаў: раённыя, гарадскія, абласныя. Пераможцы на кожным этапе становяцца ўдзельнікамі дэбатаў наступнага ўзроўню. Абласныя адкрытыя дэбаты на тэму "Наш год - наш выбар" адбудуцца 29 верасня ў Віцебску.

Кацярына Князева, БЕЛТА.