Віцебская вобласць рыхтуе пагадненне аб партнёрстве з рэгіёнам Чэхіі

Дагавор аб супрацоўніцтве Віцебскай вобласці з адным з рэгіёнаў Чэхіі плануецца падпісаць у найбліжэйшай перспектыве. Пра гэта журналістам паведаміў Надзвычайны і Паўнамоцны Пасол Чэшскай Рэспублікі ў Рэспубліцы Беларусь Томаш Перніцкі падчас беларуска-чэшскага бізнес-форуму, які праходзіць сёння ў Віцебску.

Паводле яго слоў, першым крокам да развіцця адносін паміж Віцебшчынай і чэшскімі рэгіёнамі стане пашырэнне ўзаемадзеяння ў эканамічнай сферы. На Віцебшчыне паспяхова працуюць два прадпрыемствы з удзелам чэшскага капіталу. Адным з іх створана акцыянерным таварыствам «Цыліндэрс Холдынг» сумесна з ААТ «БМЗ — кіруючая кампанія холдынгу «БМК» у Оршы. Гэта вытворчасць стальных бясшвовых газавых балонаў, урачыстае адкрыццё якога плануецца 5 лістапада. Разам з тым, як падкрэсліў намеснік міністра замежных спраў Чэшскай Рэспублікі Марцін Тлапа, на дадзеным этапе паспяховае эканамічнае партнёрства неабходна дапоўніць развіццём кантактаў на міжрэгіянальным узроўні.

— Віцебская вобласць уяўляе вялікую цікавасць для Чэхіі, таму развіццё супрацоўніцтва паміж рэгіёнамі стане асновай для выхаду адносін на новы ўзровень, — лічыць Марцін Тлапа. Падчас перамоваў у аблвыканкаме, якія адбыліся напярэдадні форуму, дасягнуты дамоўленасці аб арганізацыі візітаў афіцыйнай дэлегацыі Віцебшчыны і правядзенні бізнес-місій у Чэхію ў 2020 годзе.

Удзельнікі бізнес-форуму, пляцоўкай якога стала СЭЗ «Віцебск», атрымалі магчымасць прэзентаваць сваю прадукцыю і паслугі, правесці перамовы з чэшскімі кампаніямі, зацікаўленымі ва ўсталяванні супрацоўніцтва ў такіх сферах, як энергетыка, водаачыстка, лагістыка, сельская гаспадарка і шэрагу іншых.

"Віцебскія весці". Фота газет "Віцебскія весці" і "Віцьбічы".