Віцебская вобласць і Паўночная акруга Масквы рыхтуюць праграму па развіцці супрацоўніцтва

Праграму сумесных мерапрыемстваў па развіцці супрацоўніцтва рыхтуюць Віцебскі аблвыканкам і прэфектура Паўночнай адміністрацыйнай акругі (ПАА) Масквы, паведамілі карэспандэнту БЕЛТА ў камітэце эканомікі Віцебскага аблвыканкама.

Праграма сумесных мерапрыемстваў разлічана на 2013-2015 гады. Яна прадугледжвае праекты па ўдасканаленні супрацоўніцтва паміж дэпартаментамі, камітэтамі і ўпраўленнямі, райвыканкамамі і управамі. Аналагічна плануецца да падпісання план мерапрыемстваў па гандлёва-эканамічным, навукова-тэхнічным і гуманітарна-культурным супрацоўніцтве паміж Віцебскай і Смаленскай абласцямі.

Віцебская вобласць ажыццяўляе эканамічнае супрацоўніцтва з усімі федэральнымі акругамі Расійскай Федэрацыі і з 78 рэгіёнамі. У першую тройку па найбольшым аб'ёме экспартных паставак уваходзяць Маскоўская вобласць, Масква і Смаленская вобласць.

Як адзначылі ў камітэце, узаемнае супрацоўніцтва рэгіёнаў дазваляе прадпрыемствам вобласці развіваць у Расіі сваю тавараправодзячую сетку. Так, больш за 30 гандлёвых аб'ектаў адкрыта сумеснае прадпрыемства "Белвест", шырокую сетку дылераў маюць прадпрыемствы "Віцебскія коўры", "Віцязь", "Фортэкс", "Альянс-пласт", "Марка". Прадпрыемствы "Саюз-кабель" і "Энергакомплект", якія выпускаюць кабельную прадукцыю, уваходзяць у склад расійскіх холдынгаў. У Маскве ажыццяўляюць дзейнасць прадпрыемствы тавараправодзячай сеткі Глыбоцкага малочна-кансервавага камбіната. Акрамя таго, суб'екты гаспадарання Расійскай Федэрацыі выступаюць асноўнымі інвестарамі прадпрыемстваў вобласці: 87% ад усіх паступіўшых інвестыцый - расійскія.

За студзень 2013 года прадпрыемствы Віцебскай вобласці экспартавалі прадукцыі на $153,8 млн., пры гэтым 51% экспарту прыпадае на Расійскую Федэрацыю. Тэмп росту экспарту ў Расію ў студзені бягучага года да студзеня 2012 года склаў 121,3%. У агульным аб'ёме экспарту ў РФ на долю мяса-малочных прадуктаў прыпадае 28%, па 10% - на вырабы з поліэтылену, тэкстыль і будматэрыялы.